Gihugpaan sa dul-an sa 1,000 ka mga batan-on ang pagbukas sa Responsible and Empowered Youth (REY) kagahapon, Hulyo 31, 2022, sa Barangay Guadalupe, Dakbayan sa Carcar.
Ang mga batan-on gitapok aron nga magkahiusa alang sa kalamboan sa komunidad.
Si Konsehal Rey Anthony Lawas sa Barangay Guadalupe, Carcar nga nahinabi sa Superbalita Cebu, nagkanayon nga iyang gihimo ang organisasyon sanglit ang kabataan maoy paglaom sa nasod.
Sa maong katuyoan, nakahukom si Lawas og Responsible and Empowered Youth (REY).
Gipadayag niini, nga gigahinan niya ang maong organisasyon sanglit daghang kabataan sab nga nagkinahanglan sa abag alang sa kalamboan.
Ang maong kalihukan gisuportahan sab sa iyang mga kaubang konsehal sa barangay.
Sumala pa niini nga sa umaabot nga adlaw, palapdan pa unya niya ang maong kalihukan nga tibuok youth na sa dakbayan sa Carcar.
Si Berverly Conocono, 22, usa ka youth convenor, nagkanayon nga dako ilang pasalamat kang Lawas nga nagdasig sa kabataan.
Gani, ang gihimo ni Lawas nakapadasig kanilang kabatan-onan.
Naghinaot sila nga mas modaghan pa unya ang mga batan-on nga mosalmot niini.