Nadakpan na ang duha ka notadong tulisan sa mga sakop sa Abellana Police Station 2 sa Cebu City Police Office (CCPO) uban sa mga barangay tanod, alas 2:30 sa kaadlawon, niadtong Sabado, Hulyo 23, 2022.
Apan si Police Major Nolan Tagsip, hepe sa Abellana Police Station sa Cebu City Police Office (CCPO), nihangyo nga dili una ibutyag ang tinuod ngalan sa duha ka mga suspek samtang nagpadayon ang ilang dugang imbestigasyon ug gihimong follow-up operation sa pagsikop sa mga kauban sa duha ka dinakpan.
Matod ni Tagsip, ang magmotorsiklo nga tulisan sagad mobiktima sa mga naglakaw sa General Maxilom Avenue duol sa simbahan sa Iglesia ni Cristo sa uptown sa dakbayan.
Dugang ni Tagsip, ang duha dili taga siyudad sa Sugbo. Usa ang nagpuyo sa Barangay Yati, lungsod sa Liloan nga nag-edad og 23 ug ang 26 anyos taga Barangay Lamac, lungsod sa Consolacion, pulos sa amihanan sa lalawigan sa Sugbo.
Giawhag ni Tagsip ang mga nabiktima sa duha ka notadong tulisan nga mobisita sa ilang police station aron ilang idugang sa kaso nga gipasaka nila niadtong Lunes, Hulyo 25, 2022.
Gisaysay ni Tagsip nga samtang nag-roving ang iyang mga personnel inabagan sa mga tanod sa managlahing lugar, nasugatan nila sa dalan Ramos ang usa ka babaye uban sa iyang manghod nga taga dan San Miguel, Sitio Phantom, Barangay Lorega nga nitug-an nga gitulis sila sa duha ka lalaki nga nagsakay og XRM nga motorsiklo.
Dali nila kini nga gigukod ug ilang naapsan sa Barangay Cogon Ramos ang duha ug gitabangan usab kinig kulata sa mga estambay sa maong dapit human masayri nga tulisan kini.
Nabawi nila ang bag sa biktima nga adunay sulod nga cellular phone nga mobalor sa P10,000 ug personal nga gamit niini.
Ang modus sa duha magbahasbahas sa mga ngitngit nga lugar sa dalan Ramos ug sa General Maxilom.
Mag-estambay kini atbang sa simbahan sa Iglesia ni Cristo magabii.