2 patay sa bangga

DUHA ang patay, tulo ang angol sa bangga tali sa usa ka motorsiklo ug bus nga niangin sa laing duha ka mga sakyanan alas 10:45 sa Biyernes sa buntag sa national highway sa Brgy.Bogo, lungsod sa Argao, habagatang Sugbo.

Ang lugar atubangan sa Isidro Kintanar Memorial Hospital.

Ang namatay giila sa kapulisan nga sila si Marilou Campomanes, hingkod, taga lungsod sa Minglanilla ug Trinidad Quevido, 23, taga Brgy. Consolacion, lungsud sa Dalaguete.

Usa sa tulo nga naangol giila nga si Jonard Maliao, 28, taga Minglanilla.

Sa pagsuwat ning taho, wa pa mailhi sa kapulisan ang duha ka mga pedestrian nga nangaangol nga naa sa tambalanan.

Si Chief Insp. Rolan Aliser, hepe sa Argao Police station nga nahinabi sa SuperBalita Cebu, niingon nga ang motorsiklo gimaniho ni Jonard Maliao.

Iyang angkas si Campomanes gikan sa Minglanilla paingon sa lungsod sa Dalaguete.

Pag-abot sa dapit, si Maliao nisuway sa pag-over take sa nag-unang tanker.

Apan nibalik siya sa iyang lane kay dunay Ceres bus nga nga iyang gikasugat padulong sa Dakbayan sa Sugbo.

Ang bus gimaniho ni Ryan James Pangilinan, 37, taga Lutopan, Dakbayan sa Toledo.

Apan uwahi na kaayo ang ilang paglikay, naigo sila sa Ceres bus. Tungod sa kakusog sa impact, nangalagpot sila gikan sa ilang gisakyang motorsiklo.

Namatay diha-diha si Campomanes samtang si Maliao naangol.

Ang Ceres bus ni-swerve ngadto sa tuo sa karsada dayon nidaro sa duha ka mga motorsiklo nga gi-park.

Sila si Quevedo ug laing duha ka mga pedestrian nga nanglabang nabag-iran sa bus.

Si Quevedo namatay diha-diha human malagpot samtang ang laing duha ka tawo daling gidala sa ospital.

Sumala pa ni Aliser nga kusog kaayo ang dagan sa motorsiklo hinungdan nga naapiki ug naabtan sa bus.

Si Quevido gikataho nga magpalit unta og tambal sa pharmacy alang sa iyang anak nga nasakit.

Si Pangilinan kasamtangan nga gitanggong samtang gihikay pa ang tukmang kasong ipasaka batok kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph