MAPASIGARBUHON ang tanang naglangkob sa Barangay Pangyan sa Calinan District, Davao City human nga sila ang giilang labing unang barangay nga recipient sa Local Government Support Fund-Support to Barangay Development Program (LGSF-SBDP).
Sa istorya nga na-post sa Facebook page sa City Social Welfare and Developement Office-Davao, madasigong nilang gipahibalo nga ang Barangay Pangyan ang unang barangay nga benepisyaryo sa nasampit nga programa sa LGU-Davao.
Hulyo 29, 2022, malampusong gilusad ang Livelihood Project sa Goat Raising ug Capability Building sa TARA NA CBRAP Enrollees sa koordinasyon sa CSWDO, Department of Interior and Local Government (DILG), City Anti-Drug Abuse Council (CADAC), Philippine Drug Enforcement Agency (PDEA), Davao City Police Office (DCPO), City Veterinarian Office, City Agriculturist Office ug Konseho sa Barangay Pangyan gipangulohan ni Bartolome C. Carillo.
Nila pa nga di magkab-ot ang maong kalampusan kung wala ang kooperasyon ug katawhan sa Barangay Pangyan ug paningkamot sa mga opisyal ning maong barangay.
Nagkadaiyang programa sa komunidad ang gihimo sa Barangay Pangyan nga nahimuslan sa mga lumolupyo.
Gisumite kini sa panel, miagi sa delibirasyon ug nahukman nga ang Barangay Pangyan ang ilhon nga unang barangay recipient sa LGSF-SBDP.