‘Notadong kawatan’ napatay sa tag-iya sa balay nga gisaka

Giingong notadong akyat bahay napusilan patay sa tag-iya sa balay nga iyang gisaka human naaktohan nga nangawat og bag nga adunay sulod nga dakong kantidad sa kwarta sa alas 4:45 sa kaadlawon sa Dominggo, Hulyo 31, 2022 sa sitio Almacin, Barangay Calamba, siyudad sa Sugbo.

Giila ni Police Major Eraño Regidor, hepe sa Sawang Calero Police Station, nga notadong kawatan si Jason Gelig Laag, alyas Ison, lumolupyo ra usab sa maong lugar.

Samtang ang nakapusil kaniya mao si Rogell Dela Cruz Gingoyon, 27.

Matod ni Regidor nga nisulod si Laag sa balay ni Gingoyon agi sa koral. Dihang nakasulod nidiretso og saka sa ikatulong andana diin gikuha niini ang bag nga adunay P20,000 nga kwarta sa asawa Gingoyon ug headset nga mobalor og P4,500.

Dali unta nga nisibat si Laag apan iyang nasugatan si Gingoyon nga niadtong tungora nagbitbit na sa iyang armas nga kalibre Glock 19 GEN5 pistol.

Gisinggitan pa siya ni Gingoyon og “Hoy, asa man ka?” apan giingon kalit lang nikuha ang suspek sa Black Widow Magnum .22 caliber revolver nga gisuksok sa bulsa dayong tion kang Gingoyon.

Tungod kay usa ka shooter si Gingoyon, iya kining giunhan og pusil tumong sa tiyan aron pag disable niini nga miresulta sa pagkatumba ni Laag.

Human niya mapusili, nanawag dayon si Gingoyon og ambulansya sa Brgy. Calamba aron madali pagdala sa tambalanan apan pipila ka gutlo ang nakalabay, nakabsan sa kinabuhi ang suspek nga gituohang tungod sa kadaghan sa dugo nga miagas.

Nitahan usab dayon si Gingoyon dala ang iyang armas nga gi-turnover usab sa Sawang Calero police kasamtangan siya nga gibalhog.

“Paglagubo nakamata siya mao to iyang gisusi. Nya kahibawo man siya anang lugara nga daghang kawatan, nagbitbit na siya sa iyang armas. Iyang gi check. Paggawas niya iya nang nahinagboan katong kawatan. Iyang gisinggitan. Karon pag-atubang niya nakaila man siya kay iya ra man ning silingan nya public figure man ni sa ilaha, nibunot naman hinuon ni sa armas, aw gipikhan niya,” asoy ni Regidor.

Matod ni Regidor nga notado na nga kawatan si Laag.

Gani aduna na kini record sa Parian Police Station sa pagpangawat, duha ka insidente sa kawat sa Calamba samtang gidakop na usab siya sa kasong illegal gambling sa Pasil sa miaging duha ka tuig.

Positibo usab kini nga giila sa mga nabiktima sa pagpanulis sa Mambaling ug ubang lugar nga sakop sa Sawang Calero Police Station.

Sa nakuha nga impormasyon sa kapulisan, adunay duha ka armas nga kalibre .45 ug .357 caliber revolver si Laag nga gigamit sa pagpanulis apan gipang prenda sa Brgy. Mambaling.

Apan bisan kon naestablisar nila nga self defense ang gihimo ni Gingoyon, mopasaka gihapon og kaso ang kapulisan sa Sawang Calero sanglit aduna may nakalas.

Bahala na ang Cebu City Prosecutor’s Office sa paghukom kon angay bang isang-at ang kaso sa korte batok kang Gingoyon, dugang sa hepe.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph