Gitudlo ni Presidente Ferdinand “Bongbong” Marcos Jr. si Lieutenant General Rodolfo Azurin Jr. isip hepe sa Philippine National Police (PNP), matud ni Press Secretary Trixie Cruz-Angeles niadtong Lunes, Agusto 1, 2022.
Si Angeles niingon nga si Azurin usa ka “well-rounded” nga opisyal sa kapulisan nga nagserbisyo sa PNP sa lainlaing mga kapasidad, sa mga operasyon ug administratiba nga trabaho.
Si Azurin, kinsa mao karon ang commander sa Northern Luzon Police Area nga gilangkuban sa mga rehiyon sa Ilocos (Rehiyon 1), Cagayan Valley (Rehiyon 2), Central Luzon (Rehiyon 3) ug sa Cordillera Administrative Region, miyembro sa Philippine Military Academy “Makatao” Class of 1989.
Nagkadaiyang mga katungdanan sa PNP iyang nahuptan, sama sa direktor sa Directorate for Comptrollership (DC) ug Directorate for Information and Communication Technology Management (DICTM).
Nagserbisyo usab siya isip direktor sa Maritime Group ug pagkahuman isip regional director sa Police Regional Office sa Ilocos, lungsod nga natawhan ni Marcos.
Ubang mga buhatan nga iyang gihuptan mao ang Benguet Provincial Police, Highway Patrol Group ug Presidential Anti-Organized Crime Task Force.
Isip junior officer, si Azurin nadestino sa nagkalainlaing field units ug opisina nga naglakip sa mosunod: 1st Special Action Company sa Parang, Maguindanao; 231st Philippine Constabulary (PC) Company sa Quezon Province; Police Aviation Security Command — karon ang Aviation Security Group (AVSEG); Criminal Investigation Service Command — karon ang Criminal Investigation and Detection Group (CIDG); Office of Internal Security (OIS); Department of the Interior and Local Government (DILG); Serbisyo sa Panglawas; Police Community Relations Group — karon ang Police Community Affairs and Development Group (PCADG); ingon man ang Directorate for Personnel and Records Management (DPRM).
Si Azurin moretiro sa serbisyo sa kapulisan karong Abril 24, 2023. (TPM sa SunStar Philippines)