Daw sa adunay pipila ka mga batan-on ang wa mahimuot atol sa gihisgutan ni Presidente Ferdinand “Bongbong” Marcos Jr. sa iyang unang State of the Nation Address (SONA) nga ipatuman pagbalik ang Reserved Officers’ Training Corps (ROTC) apan alang sa mga tinun-an na sa senior high school ug di sa mga unibersidad.
Sa akong panahon, wa ko magtuo nga mandatory ang ROTC basta ang akong nasabtan apil kini sa mga subject nga among kuhaon unya matag Dominggo moadto sa Camp Lapu-Lapu grounds nga anaa ang headquarters sa Visayas Command (Viscom). Upat ka semesters ko nga na-enroll niini diin ang akong uniporme sa high school diin opisyal ko sa Citizens Army Training (CAT) mao ra sad akong gigamit.
Di bag-o nako ang mga gipangtudlo sa ROTC kay sama ra man usab kini sa among gitun-an sa high school pa mi. Gani, nagtabang ko sa tunghaan nga ang akong amahan maoy CAT Commandant panahon nga mangandam na sila sa tactical inspection bisan kompetensiya mi.
Nakasuway mi nga magdala ug moguba og mga armas apan wa mi nakasuway sa pagpabuto niini. Anaa usab ang among kasinatian sa map reading nga adunay mga esena kunohay nga anaa kay kontra sama giyera unya magplano ka sa imong mga atake batok kanila.
Nasilsil sa akong alimpatakan samtang anaa ko sa ROTC nga sa higayon nga dunay gubat nga mahitabo, andam na mi aron depensahan ang nasud sa kadaghan nga among nakat-unan. Apan, wa ko mangandoy nga adunay gubat aron magamit ang akong nakat-unan. Hinuon, ang nangagi nga mga nigraduwar sa ROTC sila man ang nalambigit sa pagdepensa sa Pilipinas atol sa Ikaduhang Gubat sa Kalibutan.
Di na ta mosentro nga ang mga mograduwar sa ROTC atong iandam alang sa gubat, apan mas maayo tingali mokat-on sila unsaon sa pagsalbar ning mga biktima sa kalamidad sama sa panahon sa bagyo, linog ug ubang mga trahedya kansang ang Pilipinas matag tuig daghang tawo ang mga makalas.
Angay nga itudlo kanila kon unsaon ang pagsalbar sa kinabuhi sa bisan unsa nga paagi. Mas maayo nga daghang mga tawo ang makamao nga mosalbar og kinabuhi aron di kini mausik sama sa mga panghitabo nga natagamtaman sa pipila ka mga dapit sa Pilipinas nga kon dunay pay makamao mosalbar kanila, buhi pa unta sila karon ug napuslan sa katilingban. (josephelvirtubilan@gmail.com)