Kapitan sa Don Juan Climaco Sr. sa siyudad sa Toledo nga adunay duha ka mga ihap sa kasong grave threats gidakop sa mga sakop sa Criminal Investigation and Detection Group Cebu Provincial Field Unit alas 11:30 sa Martes sa buntag, Agusto 2, 2022.
Ang CIDG-CPFU inabagan sa 2nd Provincial Mobile Force Company sa Cebu Police Provincial Office (CPPO) ug Toledo City police station ning-serve sa warrant of arrest nga giluwatan ni Judge Ruben Altubar sa Regional Trial Court (RTC) Branch 9 sa siyudad sa Toledo batok kang Kapitan Walter Ng Lao, 48.
Adunay gitugot nga piyansa ang korte nga mobalor og P360,000 alang sa iyang temporaryong kagawasan.
Matod ni Police Major Richard Macachor, hepe sa CIDG Cebu Provincial Field Unit, nga ilang nadawat ang kopya sa warrant of arrest niadtong Lunes, Agusto 1, 2022 ug gipaubos dayon nila sa surveillance.
Human nasuta nga naa ra siya sa iyang balay, gi-serve dayon nila ang warrant, apan sa pag-abot sa mga operatiba sa CIDG, didto usab ang bodyguard niini nga si Jess Del Valle Esguerra, 41,silingan sa kapitan.
Nabantayan sa mga operatiba nga nibugol ang hawak niini hinungdan nga ilang girekisa ug ilang nasuta nga nagtakin kini og kalibre .45 nga pistola nga adunay unom ka mga bala.
Sa dihang gipangayoan siya og dokumento sa armas ug lisensya, wala siyay gikapakita hinungdan nga gidakop og diretso sa CIDG. Gibutyag ni Macachor nga wala na makurat pa ang kapitan sa ilang presensya sanglit nasayod na kining daan nga aduna siyay mogawasay nga warrant of arrest.
“Gi verify muna namin kon asa na siya pagkadawat namo sa warrant. Murag nakahibawo naman siya sa iyang kaso. Pag-abot namo nagpakilala mi tapos ana sya ‘nakabalo na ko ana, Sir’.Nikuyog ra pud siya,” matod ni Macachor.
Kasamtangan nga gibalhog sa selda sa Toledo City Police Station si Lao samtang Esguerra ilang gidala sa buhatan sa CIDG 7 alang sa ipasaka nga kaso nga kalapasan sa Section 28 sa Republic Act 10591 kun The Comprehensive Law on Firearms and Ammunition and Providing Penalties for Violations Thereof.
Ang maong operation, sigun ni Macachor, kabahin sa ilang flagship program sa CIDG pinaagi sa ilang labaw nga si Police Major General Eliseo DC Cruz nga Oplan Pagtugis batok sa wanted persons ug Oplan Paglalansag Omega.
Wa hinuon siya nihatag og background sa kaso batok ni Lao.