IDUSO sa lokal nga panggamhanan sa lungsod sa Compostela, Davao de Oro, ang pagmugna og ordinansa nga pabor ngadto sa mga kaigsuonang person with disabilities (PWDs) aron nga sama sa mga senior citizens duna sab silay madawat nga binulan nga kuwarta nga magamit sa ilang panginahanglan.

Kini ang gibutyag ni Konsehal Harry Cabiling, tsirman sa Committee on Social Services.

Subay sa iyang paglibot sa kabaranggayan sa lungsod, matud niya, iyang nakita ang kahimtang sa mga kaigsuonang PWDs nga maingong nabiyaan gayud sa ubang lungsuranon busa buot niya, uban sa mga kaubanang konsehal, ilawom sa bag-ong liderato ni Mayor Levi Ebdao ug Bise Mayor Ricky Hechanova nga mapasar ang ordinansa nga magtumong sa pagtabang sa mga PWDs sa lungsod.

Sa maong ordinansa, ang mga PWDs adunay madawat nga social pension sama sa mga senior citizens.

Hinuon, giklaro ni Cabiling nga iseguro gayud kadtong mga PWDs nga mga indigents o walang-wala nga maoy makapahimulos sa balaudnon sa higayon nga kini maaprobahan na sa Konseho.