DELIKADO ang giingong caustic soda nga midagayday sa Suawan River human nga nahulog ang tanker truck padung sa bung-aw.
Kini ang gibutyag ni Alfred Baloran, ang pangulo sa City Disaster Risk Reduction and Management Office (CDRRMO) atol sa interview sa Davao City Disaster Radio, Agosto 2, 2022.
"Delikado man gud ni siya, it's very harmful, makapaso ni siya sa atong panit, magsuka ang tao, maka-diarrhea and difficulty of breathing," ingon ni Baluran.
Ang Caustic Soda maoy gamiton nga tiglimpyo sa tubo sa kanal, makatangtang sa mga bara sa kanal labi na sa mga grasa, gigamit sab kini sa paghimo og sabon ug mga detergent products.
Una niini, nagpahibalo ang CDRRMO sa mga Dabawenyo, labi na sa mga namuyo duol sa Davao River ug sa mga namuyo sa Barangay Suawan, Marilog District, Davao City human nga dunay insidente sa chemical spill sa maong sapa.
"Dili lang sa ta mangaligo ug mangisda kay gina-examine sa atoang mga concern offices ang kaning tubig sa sapa kung unsa gyud ang effect sa sodium hydroxide (caustic soda) sa Davao River," ingon ni Baluran.
Kini human nga nadisgrasya ang usa ka tanker truck diin nahulog sa pangpang sa Brgy. Suawan, dunay usa ka tawo ang dead on the spot ug usa ang naluwas, Lunes sa gabii, Agosto 1.
Gibutyag sab ni project coordinator Lemuel Manalo sa Interfacing Development Interventions for Sustainability (Idis) nga ang caustic soda diha sa high concentration niini puwede kining makasunog sa panit labi na kung magunitan kini nga walay proper protective equipment.
"It's not a friendly chemical na madaling i-tolerate ng humans. If you touch the water, possible na may skin burns especially doon sa concentrated areas," ingon ni Manalo.
Dugang pa niya nga ang chemical spill adunay direktang kadaut sa palibot sa lugar nga nahitaboan ug sa palibot niini diin ang chemical spill nagkonsentrar.
Sa laing bahin, ang City Health Office (CHO) niingon nga ang Sanitary Inspection (SI) Unit nipahigayon na og water testing aron masusi ang kontaminasyon sa tubig sa Suawan River.
"Kapag mabilis ang river flow, ang discharge rate niya, mas mabilis rin ang pag-contaminate ng pollutants sa iba’t-ibang areas ng Davao River. May pwedeng gawin as treatment pero hindi na siya as effective because we cannot predict anymore yung coverage ng spillage because of the waterflow," ingon ni Manalo.
Sa report gikan sa Davao City Central 911, nakadawat sila og vehicular crash call alas 11:44 sa gabii, diin alas 7:52 sa buntag kagahapong adlawa, Agosto 2, ang USAR Unit maoy mi-rescue sa duha ka mga biktima.
Ang usa nga na-trap, gitambalan sa lugar sa EMS Unit kinsa nagdumili kini nga dalhon sa ospital.
Subay sa report sa awtoridad, ang tanker truck nahulog gikan sa mga 50 ka tiil nga gilawmon sa bung-aw diin karga niini ang kemikal nga caustic soda.
Sanglit ang nahulogan sa truck duol sa sapa, ang sulod sa tanker midagayday ngadto padung sa sapa hinungdan nga ang Davao City Disaster Risk Reduction and Management Office (CDRRMO) miingon nga dunay nahitabong chemical spill sa Suawan River.
Tungod sa kontaminasyon sa tubig, gipahimangnoan niini ang tanang barangay sulod sa mga sapa sa Davao River sa daplin sa Suawan River nga mag-alerto ang mga residente ug likayan ang pagkaligo sa sapa, pagpamingwit og isda ug uban pang aktibidad sa nasampit nga sapa.
Sa pagsulat niini, wala pa makadawat ang SunStar Davao og katikaran kalabot sa insidente sa chemical spill sanglit padayon pa nga giimbestigahan sa Department of Environment and Natural Resources sa Davao (DENR-Davao) ang maong hitabo. (Uban sa taho nila Krizzy S. Daugdaug ug Iona Finlay C. Mendoza)