Lalaking hubog nga nagmaniho sa motorsiklo nakabangga sa laing motorsiklo nga nisangko sa kamatayon sa usa ug pagkaangol sa laing duha sa alas 6:30 sa gabii sa Lunes, Agusto 1, sa Sitio Frenza, Barangay Talaga, lungsod sa Argao.
Ang namatay giilang si Marlit Aballe Cañete, 45, taga Barangay Guadalupe, dakbayan sa Sugbo.
Mga nangaangol giilang sila si Joshua Allego, 32, ulitawo, construction worker, taga Sitio Bayabas, Brgy. Cansuje, lungsod sa Argao, kinsa gihulagway nga hubog nga nagmaniho sa motorsiklo ug si Cloudy Allego, iyang angkas, kritikal.
Si Police Staff Sgt. Jorge Tapales, imbestigador sa traffic police sa Argao nga nahinabi sa Superbalita Cebu, nagkanayon nga nikawat sa pikas lane si Joshua nga nagmaniho.
Si Joshua nitug-an nga gikan sila sa ilang balay nag-inom. Human niini, sila nisakay sa motorsiklo ug nagtiwas sa pag-inom sa lungsod sa Dalaguete.
Dihang namauli, wala silay mga helmet ug kusog kaayong nakapadagan sa Rusi nga motorsiklo. Gikasugat nila si Cañete nga padulong sa south ug nagkabangga sila. Gumikan sa kakusog sa impact, maayong pagkabungkag sa duha ka mga motorsiklo.
Si Cañete naka-helmet, apan sa kakusog sa impact sa pagkabangga, patay na siyang naabot sa ospital.