Dul-an sa P800,000 nga balor sa illegal nga drugas nasakmit sa mga sakop sa Regional Drug Enforcement Unit (RDEU) sa Police Regional Office (PRO) 7 inabagan sa Tagbilaran City Police Office (TCRO) atol sa gilusad nga buy-bust sa Barangay Dampas, dakbayan sa Tagbilaran, probinsya sa Bohol sa Martes sa gabii, Agusto 2, 2022.
Ang mga suspek giila nga sila si Noe Caballo Abucay, 30, ug Maria Patay Dominise, alyas Vic-vic, 24, nagpuyo sa dapit.
Matod ni Police Brigadier General Roque Eduardo Vega, hepe sa kapulisan sa PRO 7, ang duha pulos nalakip sa drug watchlist sa PRO-7.
Nasakmit gikan kanila ang 115 gramos sa gituohang shabu nga adunay standard drug price nga P782,000 ug buy-bust money nga P500 ug bag nga gisudlan sa timbangan sa illegal nga drugas.
Giapil sa pagsakmit ang Yamaha Mio nga motorsiklo nga maoy gigamit sa pag deliver sa illegal nga drugas.
Gipasalamatan ni Vega ang mga operatiba sa malampuson nga operation lakip na ang publiko nga maoy naghatag sa impormasyon labot sa illegal nga negosyo sa duha.
“I commend the operatives for their swift action and the locality of Tagbilaran City for the information provided, which resulted in the arrest of high-value drug suspects in Tagbilaran City. The campaign against illegal drugs remains one of our top priorities in Central Visayas. We will be in the frontline,” matod ni Vega.
Matod ni Vega nga naa pay daghang drug personalities nga naa sa ilang watchlist.