Nagkadaghan nga mga menor de edad ang nabantayan sa Philippine Drug Enforcement Agency (PDEA) 7 nga nalambigit sa illegal nga drugas.
Sila maoy gigamit sa pagtunol sa pakete sa gituohang shabu sa mamalitay niini.
Si PDEA 7 Assistant Director John Mark Malibiran niingon nga base sa nakuha nila nga intelligence monitoring, ang maong mga bata ang gihimong runner sa illegal drugs sa usa ka barangay sa siyudad sa Sugbo.
Wa nitug-an si Malibiran kon unsa nga barangay kini apan duna silay nakuha nga mga impormasyon nga kasaligan kaayo.
Gawas nga sila ang mamaligya, sila usab ang mga mata sa hamtong na nga mga drug player sa barangay nga daling maka signal kon adunay mga pulis o ahente sa PDEA nga molusad og surveillance.
Sa mga operation nila sa mga drug den, duna silay ma-rescue nga mga bata nga nag pangidaron og 12 hangtod sa 14 anyos.
“Naa koy balita somewhere here sa barangay mga minors ang nagabaligya og kining sachet-sachet. Makabalo pa na sila kon naay operation, ‘naay pulis-naay pulis’ ug manago dayon na sila, naa na diri, one of the operations nga gi monitor namo,” matod ni Malibiran.
Usa sa mga police official sa Police Regional Office 7 nga dili lang magpaila mitug-an usab nga mga bata nga nag edad og 8 anyos paingon sa 15 ang gigamit karon sa mga durugista sa Alaska Mambaling.
Dunay video nga iyang gipakita diin makita ang pagtunol sa mga bata sa pinakete nga gituohang shabu sa iyang kustomer.
Si Leah Quintana, regional information officer sa Department of Social Welfare and Development (DSWD) 7, nagkanayon nga kon adunay mga menor nga madakpan sa anti illegal drug operations, ipaubos kini sa assessment sa ilang ahensya.
Iyang gibutyag nga biktima lang usab ang maong mga bata gikan sa mga hamtong na nga nalambigit sa illegal nga drugas.
Matod niya nga ang angay nga ikiha kadtong mga nagsugo sa mga bata nga mamaligya sa illegal nga drugas tungod kay mamahimong gihadlok lang kini kon dili motuman sa mando.
“Atong tan-awon nga ang bata dinha biktima, so kung i-punish nato ang mga bata tungod ana? Ang mga dakpo ang dapat ang atong i-punish because sila man ang nag gamit sa mga bata. Kay ang mga bata man gud pwede nimo hadlokon, pwede nimo i-coerce, pwede nimo haylohon kay lagi mga bata pa sila,” matod ni Quintana.
Giklaro hinuon niya nga adunay mga programa ang Kagamhanan sa Dakbayan sa Sugbo sa mga menor de edad nga makahimog krimen diin ibutang sila sa usa ka pasilidad alang sa ilang rehabilitasyon.
Apan kasagaran kanila pulos lang mga biktima sa sitwasyon nga angay nga mahatagan og pagtagad.