NABALAKA ang mga drayber sa mga pampasaherong sakyanan partikular sa lungsod sa Compostela, Davao de Oro, sa subling pag-arangkada sa gikalisangang sakit nga coronavirus disease 2019 (Covid-19).

Sa bag-ong talaan nga gipagawas sa Davao De Oro Emergency Operation Center, giingong duna na'y 17 ka bag-ong kaso sa sakit gikan sa unom ka mga lungsod sa probinsiya.

Ang mga lungsod mao ang Maragusan nga dunay upat ka bag-ong kaso sa Covid-19; Monkayo nga dunay duha; Montevista nga dunay lima; Laak nga dunay usa; Maco nga dunay upat; ug Nabunturan nga dunay usa.

Ang habal-habal drayber nga si alyas Nonoy, 47, nabalaka sa maong impormasyon sanglit "expose" sila sa nagkalain-laing mga tawo matag-adlaw. Tungod niini, nakahukom siya nga magpa-booster shot na human nga nakompleto na ang iyang una ug ikaduhang dose.

Tuod man, dako ang iyang kalipay sanglit human ma-booster, nakadawat pa kini og lima ka kilo nga bugas ingon man mga delata nga gihatag gikan sa lokal nga panggamhanan sa lungsod.

Gihimo kini aron nga ma-engganyo ang katawhan sa lungsod, di lang mga drayber sa mga depasaheroang sakyanan, nga magpabakuna, ma-unang dose o ikaduhang dose o booster man batok sa Covid-19.

Ang maong estratehiya gihimo sab sa laing mga lungsod sa probinsiya partikular sa Maragusan kon diin daghan sab ang mga nagpabakuna dili lamang mga drayber, lakip mga person with disabilities (PWDs) ug uban pang mga indibiduwal nga pulos nagmalipayon sa nadawat nga lima ka kilo nga bugas ug mga delata.