GIKALIPAY sa mga Dabawenyo ang "Libreng Sakay" nga gidalit sa buhatan sa Bise Presidente nga gisugdan Miyerkules, Agosto 3, 2022 sa Cebu, Bacolod, ug Davao City.

Dasig nga pormal nga miabli sa programa si Vice President ug Department of Education (DepEd) Sec. Sara Duterte, Agosto 3, didto sa Parañaque Integrated Terminal Exchange (PITX), kauban si Transportation Secretary Jaime Bautista.

Sumala ni Juvelyn Panes, 30-anyos ug call center agent nga dako iyang kalipay aron di kaayo maibanan ang iyang budget.

"Dako og tabang ni, alas 5 puwede nako mosakay kay alas 8 akong in sa trabaho, so makatipid gyud, paspas pa," ingon ni Juvelyn.

Dunay mga bus nga dunay tatak nga Office of the Vice President (OVP) ang mobiyahe sa Davao City diin gikan sa designated pick-up stations nga Roxas Avenue padung sa Lasang matag adlaw'ng Lunes ug Martes; Toril matag Miyerkules ug Huwebes; samtang ang sa Calinan matag Biyernes ug adlaw'ng Sabado nga magsugod alas 6 sa buntag hangtud alas 9 sa buntag, diin mobalik kini pagka-alas 5 sa hapon padung alas 8 sa gabii.

Gipasalig sab sa bise presidente nga madugangan pa ang mga bus nga maoy gamiton sa programa ug maserbisyohan ang ubang mga lugar sa nasud.

Una niini, malampuson ang Land Transportation Franchising and Regulatory Board (LTFRB) sa programa niini nga "Libreng Sakay" alang sa mga frontliners, diin ang maong programa natapos sab una nahuman ang administrasyon ni kanhi Presidente Rodrigo Duterte.