Usa ka 70 anyos nga lolo gidakop base sa warrant of arrest nga giluwatan sa korte sa lima ka mga kaso sa paglapas sa Republic Act (RA) 8353 kun Anti Rape Law of 1997, alas 6:39 sa gabii sa Martes, Agusto, 2022 sa Sitio Kalangyawon, Barangay Napo, dakbayan sa Carcar.
Si Police Lt. Col. Ardeolito Cabagnot, hepe sa Carcar Police Station nga nahinabi sa Superbalita Cebu, niingon nga si Pablo (di tinuod nga ngalan), minyo, mag-uuma, giakusahang nilugos sa iyang apo nga grade 7 sa 2017.
Ang Superbalita Cebu wala mobutyag sa ngalan sa suspek sa pagpanalipod sa dungog sa bata nga biktima.
Sumala ni Cabagnot, human nahibaw-an sa suspek nga gipasakaan siya og kaso, nilayas siya sulod sa lima ka tuig sa Davao apan nipauli sa Carcar ning bag-ohay lang hinungdan nga nasikop.
Ang suspek gikatahong makalima kahigayon nga niamong-among sa iyang apo hangtud nga nasakpan dihang nitug-an ang biktima.
“Nipauli ni siya kay okay naman ilang pamilya. Unya nagkabikil pagbalik, naugkat ang kaso,” dugang ni Cabagnot.
Sumala ni Cabagnot, dihang dunay nakahatag og taho sa ilang intelligence personnel, dali nilang gi-serve ang warrant of arrest nga giisyu ni Judge Joy B. Redoble, sa Branch 77 sa Regional Trial Court (RTC )7 sa Carcar City nga gipitsahan og Pebrero 19, 2020 nga walay piyansa.