Mipabaha og 33 puntos si Lucky Ecarma aron pangulohan ang Batch 2014 ngadto sa kulbahinam nga kadaugan batok sa Batch 2022, 73-70, sa Sacred Heart Ateneo Alumni Basketball Athletic Association (Shaabaa) Season 25 niadtong Agusto 3, 2022 sa gabii sa SHS-AdC campus sa Barangay Canduman, dakbayan sa Mandaue.

Gawas sa 33 puntos, si Ecarma mipakita usab sa iyang dominasyon sa ilawom nga bahin pinaagi sa paglangkat og 16 ka rebounds ug ingon man aduna pa kini tulo ka assists.

Mihatag og dakong suporta kang Ecarma mao si Jair Adrei Igna, kinsa mitali og 18 puntos ug walo ka rebounds.

Sa kadaugan, ang 2014 mao karon ang nag-una sa standings sa Division C nga may 2-0 nga baraha.

Ang napukan nga Batch 2022 nakakuha og 25 puntos gikan ni Uriel Avila ug 13 usab ang natampo ni Aldrich Alvez.

Sa laing mga duwa, yanong gidabo-dabohan sa Batch 2013 ang Batch 2021, 90-66.

Gipangulohan ni Rendell Senining ang Batch 2013 pinaagi sa iyang 33 puntos ug 1 rebound.

Sa laing mga duwa, way kaluoy nga gilubong sa Batch 2004 ang Batch 2009, 75-52, samtang gipatapsingan sa Batch 2003 ang Batch 2008, 89-76.