Walo ka mga magduduwa sa Philippine Basketball Association (PBA) nga gipangulohan nila ni San Miguel Beermen center JuneMar Fajardo ug Brgy. Ginebra Gin Kings guard Scottie Thompson ang gilakip sa mga magduduwa nga ipaslak alang sa gipalig-ong Gilas Pilipinas pool.

Si national coach Chot Reyes naa na sa proseso sa pagtapok sa labing maayong mga magduduwa alang sa dagkong mga tahas nga sagubangunon sa Gilas sa umaabot.

Magsilbeng lider sa 20-man pool mao ang Fil-Am star sa National Basketball Association (NBA) nga si Jordan Clarkson, kinsa mipasalig nga moduwa sa fourth window sa FIBA World Cup Asian qualifiers karong Agusto 2022, ug sa mismong 2023 FIBA World Cup.

Ang ubang PBA players nga isulod sa Gilas pool mao sila si Japeth Aguilar, CJ Perez, Calvin Oftana, Jamie Malonzo, Chris Newsome, RR Pogoy ug Troy Rosario.

Ilakip sab sa grupo sil si Kai Sotto, Japan B.League imports Thirdy ug Kiefer Ravena, Roosevelt Adams, ug Dwight Ramos lakip na ang college stars nga sila si Carl Tamayo ug Kevin Quiambao.