WA NAHIMONG babag sa usa ka person with disability (PWD) nga manginabuhi sama sa uban nga ang gihimong puhunan mao ang mga tiil nga ipadyak ngadto sa gidraybang traysikad.
Matud ni Arnel Tapdasan, 31, ulitawo, taga Purok 4, Barangay Poblacion, Compostela, Davao de Oro, nga bisan og putol ang wala niyang tiil, kaya niyang mopadyak sa traysikad nga iyang gidrayban.
Gisulti niya nga ang pagpamasahero og traysikad mao na ang nahimo niyang panginabuhian sulod sa hataas nga mga katuigan samtang siya nagpuyo nga nag-inusara sanglit ang iyang mga igsuon duna na'y tagsa-tagsa ka mga pamilya. Ang iyang inahan atoa sab nanimuyo sa laing barangay ug ang iyang amahan mitaliwan na ning kalibutan kapin napulo na ka tuig ang milabay.
Gisaysay niya nga ang pagkaputol sa wala niyang tiil gumikan sa aksidente niadtong nag-edad pa siya og 7-anyos human nabanggaan siya og dumptruck samtang nagdula sa dalan didto sa kanhi nila gipuy-an sa Barangay Mt. Diwalwal sa lungsod sa Monkayo.
Pangandoy ni Tapdasan nga mahimong artista ug makaeksina ang mga giidolong artista sama nila Kim Chui, Bela Padilla ug Coco Martin hinungdan nga grabe ang paningkamot nga makatigom ug kuwarta aron dunay magasto sa pag-adto sa Manila sa tinguha nga madiskubre ug mahimong artista tungod kay duna siyay talento sa pagkanta, akting ug sayaw.
Gawas nga usa sa mga "talent" sa lokal vlog ning probinsiya nga Radio Kokak, buot sab ni Tapdasan nga magmugna og kaugalingong banda nga mopasundayag sa nagkadaiyang lugar ug okasyon sulod ug gawas ning probinsiya.