SA KALISANG ug aron luwason ang kaugalingon, dul-an 60 ka mga tawo ang nanglukso sa dagat sa pag-ulbo sa dakong sunog pasado alas 9 sa gabii, Miyerkules, Agosto 3, didto sa Punta Dumalag 1, Barangay Matina Aplaya, Davao City.
Sa ihap sa Davao City Central 911, anaa sa dul-an 60 ka indibiduwal ang ilang naluwas diin ang usa gitambalan onsite sa EMS unit human kini nasamad.
Perteng kapa-kapa sa mga tawo sa dagat, samtang ang ilang kabalayan nga anaa daplin sa dagat gilamoy sa kalayo.
Nag-trending sab ang mga post sa social media diin ang porma sa aso, daw usa ka Satanas ug sa laing anggulo si Satanas nga dragon.
Apan sumala sa ubang netizens, natayming lamang ang porma nga makahimo og hulagway nga dunay buot ipasabot.
Luyo niini, nipatigbabaw gihapon ang kasubo sa dul-an 200 ka mga pamilya nga maoy naglangkob sa gibana-banang 140 ka mga panimalay subay sa nahipos nga impormasyon sa SuperBalita Davao.
Apan base sa inisyal nga ihap sa Bureau of Fire Protection (BFP-Davao), 191 ka mga pamilya ang apektado sa sunog ug 120 ka balay ang naugdaw.
Wala pa sab nagpagula ang City Social Services and Development Office (CSWDO) og pinal nga ihap sa mga biktima ug pila ka mga panimalay sanglit padayon ang ilang gihimong assessment aron makadawat og hinabang pinansiyal ang mga nasunogan.
Huwebes, sa Shanghai Gym, nagdasok ang mga biktima diin asa maoy usa sa mga lugar nga ilang gitiniran, dungan sa pagpang-abot sa mga hinabang sama sa pagkaon ug mga nag-unang mga gamit sa pagluto ug pagkaligo.
Miyerkules pa lang sa gabii, pipila ka minutos human nga gideklarang fire under control ang sunog, unang niabot ang CSWDO sa dapit alang sa pagplastar sa Kusina ng Bayan, ang mobile kitchen sa CSWDO nga maoy mohatag og unang pagkaon sa mga biktima.
Nanghatag sab og vitamins ug face masks ang City Health Office (CHO) ingon man naa na sab sa area ang mga personahe sa Davao City First Congressional District.
Padayon ang gihimong imbestigasyon sa kabomberohan aron matumbok ang hinungdan sa kalayo samtang wala pa masayri ang gidak-on sa damyos o kaha nakabsan sa kinabuhi.