Usa ka langyaw nga nikuha og video ug hulagway sa mga hubo nga batan-ong babaye nga iyang gikauban sa kama nasikop sa Door 3, Titas Apartment, sa Salvador Ext., Barangay Labangon, dakbayan sa Sugbo, alas 12:05 sa udto sa Miyerkules, Agusto 3, 2022.
Ang suspek nga napusasan giilang si Patrick Bernard, 47, ulitawo, French national, gikatahong nagnegosyo og online stock trading.
Si Police Major Janilito Marquez, hepe sa Labangon Police Station nga nahinabi sa Superbalita Cebu, nagkanayon nga si Bernardo ilang gisikop pinasikad sa warrant of arrest nga giluwatan ni Judge Ester Morales Veloso sa Branch 6 sa Regional Trial Court (RTC) 7 sa Cebu City nga gipitsahan og Agusto 3, 2022 sa kasong kalapasan sa Republic Act (RA) 9208 o Anti-Trafficking in Persons Act of 2003. Ang huwes wala nitugot sa akusado nga makabutang og piyansa alang sa temporaryong kagawasan.
Si Marquez nibutyag nga duha ka mga ihap sa kaso ang gipasaka sa 15 anyos nga dalaga nga nagpuyo sa usa ka barangay sa dakbayan sa Sugbo.
“Live sex sila sa 15 anyos, mireklamo man napasakaan siyag kaso,” dugang ni Marquez. Ang kaso gisang-at niadtong Pebrero 2018. Siya giabagan sa Women and Children’s Protection Desk (WCPD) sa Cebu City Police Office (CCPO).