Ang inahan sa 14 anyos nga dalagita nga gituohang gilugos ug gipatay sa Purok Caimito, Barangay Guimbawian, lungsod sa Pinamungajan niadtong Oktubre 2019, gipadamgo sa iyang anak nga nangayo og hustisya sa iyang kamatayon.
Si Baby Andayop nidangop sa sibyaanang DyHP RMN Cebu aron magpatabang nga mabanhaw ang imbestigasyon sa kamatayon sa iyang anak nga dul-an tulo ka tuig na, diin ang suspek ilang silingan.
Sa miaging semana, ang iyang bana ug siya gipakita sa iyang anak nga si Justine, pinaagi sa ilang mga damgo nga nagbakho nga nangayo og hustisya sa iyang kamatayon.
Matod niya nga sa maong damgo, gipakita kaniya ang pat-ak sa dugo luyo sa ilang balay paingon sa ubos samtang nagbakho ang dalagita. Nagtuo siya nga wala nahimutang ang kalag sa iyang anak sanglit wala pa nasulbad ang kamatayon niini samtang nagpabilin pa nga gawasnon ang killer.
“Sige na siyag padamgo nga naay punoan sa lubi kuno nga naay dugo ga silbing ga dan bitaw ngadto padung sa ubos. Nya human sa among damgo among giuli didto kay basin matagaan tag clue ba,” matod ni Andayop.
Ang iyang bana, tungod sa kasubo, kanunay na lang mag-inom aron makalimot sa gidangatan sa iyang anak. Wala usab siya natagbaw sa resulta sa imbestigasyon sa kapulisan sa lungsod sa Pinamungajan gumikan kay wala na molihok.
Human sa insidente niadtong Oktubre 14, 2019, dunay tulo ka mga tawo ang gipaubos sa imbestigasyon nga persons of interest. Apan sa dihang gikuhaan silag swab sample sa PNP Crime Laboratory aron itandi sa nakuha nga specimen sa lawas ni Justine, wala kini motakdo.
Sigun ni Baby nga duna siyay suspek diin iyang gitumbok ang iyang silingan. Iyang gisaysay nga pagkagabii niana, gihilantan ang iyang anak nga niadtong tungora naa ra sa sulod sa balay.
Iyang gituohan nga gituktok ang ilang balay sa killer ug gisignit sanglit nahabilin pa man ang tsinelas niini nga magpamatuod nga wala molaag ang dalagita. Wala usab mopaghot ang ilang iro nga nagpasabot lang nga nakaila kini sa tawo nga nisulod sa ilang balay. Atol sa pagpangita na nianang buntag, bisan unsaon nilag tuyoktuyok sa kasagbutan ug kalibunan, wala gyud nila kini makita.
Apan natingala sila nga nianang pagka alas 2:00 sa hapon sa maong petsa, duna nay nagsulti nga napalgan na ang ilang anak pipila ka metros lang gikan sa luyo sa ilang balay. Iyang gituohan nga dunay mialsa sa lawas niini nianang udto ug gidala sa luyo gikan sa gitagoan sa biktima.
“Imposible nga taga laing baryo ang nag hilabot, Sir, kay pagpangitaay namo wa man namo makit-i, diha na man paghuman paniudto nakit-an namo diha sa babaw sa amoa og diin na nila gitagoan,” matod ni Andayop.
Si Police Executive Master Sergeant Peter Cuanzo Jr. nga maoy investigator on case ni Justine, niangkon atol sa paghinabi ni Manlalaban Ruphil Bañoc sa iyang programa sa DyHP nga naglisud sila sa pag tumbok kinsa ang responsabli sanglit wala silay saksi.
“Problema man gud namo ani, Sir, kay hangtod karon naglisud pa gyud mi pagpangita og testigos nato nga mo pinpoint kon kinsa gyud ang atong suspect. Naa mi daghan nga persons of interest. In fact, amo sila gi-undergo og vocal swab kay naa may nakuha si Dr. Lara nga specimen sa body sa biktima pero puro man gud negative. Wala gyud ni jive sa specimen nga nakuha,” matod ni Cuanzo.