Patay ang usa ka 15 anyos human aksidenting nakuryentihan dihang nisaka sa kisame sa usa ka building sa Barangay Poblacion 1, dakbayan sa Carcar, alas 10:00 sa gabii sa Miyerkulis, Agusto 3, 2022.

Si Maiko Barawidan Canadalla, 15, taga Sitio Caipilan, Barangay Poblacion 1, Carcar, patay nang nakaplagan.

Si Police Lt. Col. Ardeolito Cabagnot, hepe sa Carcar Police Station nga nahinabi sa Superbalita Cebu, nagkanayon nga ang biktima anha mag-estambay sa nahisgutang lugar.

Dugang ni Cabagnot, wala matino ang tuyo sa biktima kon nganong nisaka sa kisame kay walay nagsugo kaniya hinungdan sa iyang pagduda nga dunay posibilidad nga manghilabot kini tungod usab kay nahitabo sa lawom nang gabii.

Sa laing bahin, duha ka mga trabahante nga nag-ayo sa gutter sa edipisyo sa dalan M. Torralba, Barangay. Cogon, dakbayan sa Tagbilaran nakuryentihan niadtong Miyerkules, Agusto 3, alas 5:30 sa hapon.

Si Police Staff Sergeant Rofel Mendoza sa Tagbilaran Police Station niila sa duha ka mga biktima nga sila si Jessie Chris Laogo, 36, molupyo sa Barangay Angilam, lungsod sa Antequera ug Michael Samuya, 33, lumolupyo sa Barangay San Isidro, lungsod sa Balilihan, sa nahisgutang lalawigan.

Sa pagtubag sa kapulisan sa Tagbilaran, nasayran nga dunay nagtrabaho sa gutter sa edipisyo apan wala damha nga dunay parte sa ilang gitrabaho ang nitapot sa main wire nga niresulta sa pag-spark sa linya ug nakuryentihan ang duha.

Ang biktima nga si Laogo nagrabihan human nalagpot tungod sa kakusog sa boltahe sa kuryente ug nasamad ang ulo. Ang duha pulos gidala sa tambalanan.

Dugang ni Mendoza nga luwas na hinuon sa kakuyaw ang duha.