Pagkataktak sa trabaho ang posibleng atubangon sa usa ka job order employee sa Social Welfare Office sa lungsod sa Barili human nagpositibo sa pag gamit og illegal nga drugas.
Kini subay sa resulta sa gihimong kinalit nga drug test sa Municipal Anti-Drug Abuse Office (MADAO) ug Rural Health Unit (RHU) sa Barili nga gipahigayon sa conference room sa lungsod sa Agusto 2, 2022.
Subay sa maong pagsulay, nipaubos sa drug test ang 464 ka mga JO sa executive ug legislative offices aron pagsiguro nga way tiggamitan og illegal nga drugas sa mga empleyado, apan usa kanila nagpositibo.
Ang pagpahigayon sa kinalit nga drug test usa sa mga ni Mayor Pablo John “John-John” Garcia IV aron pagsiguro nga magpabiling drug-free ang pagtrabaho sa mga empleyado sa kagamhanan sa lungsod.
“Sugod pa lang sa akong term, ako nang gisaad nga padayon atong misyon para ang Barili mahimong drug-free municipality. Together with the whole Barili LGU, I commit to keeping our town clear of drugs, and it starts right here sa atong munisipyo,” matod ni Garcia.
Sa kasamtangan, moabot 21 sa 42 ka mga barangay ang gawasnon na sa illegal nga drugas.
Tinguha sa kagamhanan sa lungsod nga magpabiling limpyo dili lang sa illegal nga drugas apan lakip ang illegal nga kalihukan sa mga empleyado.
Gitinguha sa lungsod nga mopahigayon og kinalit nga mga drug test sa mosunod pang mga buwan.