Dili uyon si PBBM nga mobalik ang Pilipinas pagkasakop sa International Criminal Court (ICC) kay aktibo man ang mga korte sa Pilipinas sa pag-imbestigar sa mga krimen nga nahimo sa tanan nga mga tawo, apil na ang mga gamhanan.

Apan ang oposisyon, labi na ang mga walhon, buot gayud nga mobalik kita pagkasakop sa ICC. Apan og kasaligan pa kining ICC nganong ang United States (US), Russia, China, Israel, Qatar, Iraq ug Libya dili man mga sakop niini.

Maayo tingaling ibalik pagka-membro sa ICC kon magpasakop na ang US sa maong international court.

* * *

Si anhing mayor Edgardo Labella mitudlo niadtong Enero 6, 2020 og lima ka bag-ong mga sakop sa board sa MCWD puli nila ni Chairman Joel Mari Yu nga gipulihan ni Atty. Joey Daluz kang kansang termino hangtud sa Decembre 31,2004.

Ang kang Atty. Frank Malilong ug Atty. Manolette Dinsay ug kang Jun Pe nga mo-expire karong Dec. 31, 2022. Ang kang Mike Pato mo-expire pa sa Dec. 31, 2024. Kini kon dili nila mapapugngan ang korte. Si kinsa na may mopuli kanila? Tinudlo na sab ni Mayor Mike Rama.

* * *

Si Senador Robin Padilla, sa wa pa nagsugod ang Buwan ng Wika, niawhag sa mga Pilipino sa pag-promote sa Filipino language.

Pero akong pangutan-on si Sen. Padilla. unsa may Filipino language kay aron dili maglibog ang katawhan.

Panahon pa ni anhing Pres. Ferdinand E. Marcos naghisgut nag Filipino language apan wa gyud kini maporma.

Karon Si Sen. Robin maoy mopugos kanato sa pagamit sa Tagalog nga iyang linggwahe nga gitawag niya of Filipino Language. Pagbasa kuno, Senador Robinhood!

* * *

Para kanako wa kinahanglana ang pag-renovate sa Carbon Public Market tungod kay anti-poor kini.

Gawas nga momahal ang palaliton nga ibaligya sa maong dapit, ang pagtukod og mall sa Carbon maoy mopatay sa daghang mga gagmay nga negosyo kun Small and Medium Enterprises (SMEs) tungod kay manira na man unya ang gagmay nga sari-sari store nga maoy panginabuhi sa mga kabus.

Gawas niini, ang makita sa mall kadaghanan niini dad-on sa Manila diin adto na mo-circulate ang maong salapi. Ang gihimo lang unta mao ang pagpanindut sa maong merkado sama sa Singapore Japan ug ubang mga dapit sa kalibutan. (mannyrabacal1144@gmail.com)