Duha ka mga kinabuhi ang nakalas human nadasmagan sa usa ka van ang electric tricycle niadtong sayo sa buntag sa Lunes sa mga eskina sa MJ Cuenco Avenue ug T. Padilla, Dakbayan sa Sugbo.

Kon basehan ang video nga naa na karon sa social media, puro sad-an ang mga driver sa duha ka mga sakyanan. Una, ang e-trike driver milapas sa kamandoan sa Dept. of Transportation (DOTr) ug Dept. of the Interior and Local Government (DILG) nga nagdili sa mga e-trike ug e-bike sa pagdagan subay sa mga national highway.

Ikaduha, way rehistro ug labaw nang way pagtugot sa lokal nga kagamhanan ang operasyon niini sa nasudnong kadalanan, labaw na ang pagpamasahero.

Samtang ang driver sa van kusog ra kaayong nakapadagan bisan kon naa siya sa intersection. Angay unta nga siya nimenor kay hayan naka-brake pa siya niadtong higayuna. Makita sa video ang kakusog sa pagpadagan ug pagkadagit sa e-trike.

Tungod sa kadaghan sa mga e-trike, angay nang mopasar og ordinansa ang Konseho sa Cebu City nga mag-regulate kanila sama sa mga traysikol. Angay iparehistro kay mao usab ni ang kamandoan sa Land Transportation Office (LTO).

Pinaagi sa pag-regulate, makontrolar usab ang kadaghanon sa mga e-trike nga managan sa mga karsada sa siyudad, madiktar ang mga rota ug mabansay ang mga drayber sa hustong pagmaneho sa karsada.

Sa pagkakaron, daghan na kaayong mga motorista nga nangreklamo sa kadaghan sa mga e-trike nga namasahero ug nagpataka ang mga drayber sa pagpadagan. Apan nahitabo kini tungod kay gipasagdan sa kagamhanan ang ilang pagpanaghan. Maorag kutob ra sa pagpanakop.

Tarong nga nanginabuhi ang mga trike driver, kinsa kadaghanan kanila kanhi naggamit og traysikad. Inay panakpon lang og sige, organisahon sila og tarong, dunay ordinansa nga ipasar ug klaruhon sa kagamhanan ang mga dan nga legal nilang subayan.