Nagubot ang pipila ka mga lumolupyo sa Brgy. Canlumampao, dakbayan sa Toledo sayo sa buntag sa Huwebes, Agusto 4, 2022 human madiskobrehi sa usa ka pamilya ang ilang lima ka mga baboy nangamatay na human kuhai sa atay ug kasingkasing.

Dagko nga mga iro ang ilang gidudahan nga ningpatay sa mga baboy base sa daghang mga tunob nga ilang nakit-an sa gawas sa alad nga nahimutang sa kasagingan.

Ang mga baboy gipanag-iya ni Joonrey Magno, matod sa igsuong lalaki nga si Peter (di tinuod nga ngan kay nihangyo sa Superbalita Cebu nga di siya nganlan).

Matod ni Peter sa chat sa Messenger sa Superbalita Cebu, nahitabo ang pagpatay sa Huwebes sa kaadlawon samtang nangahinanok sila sa pagkatulog.

Ang ilang inahan nakadungog og iwik sa baboy, apan nakatulog ra pagbalik.

“Nakamata akong mama pero nakatulog ra pod siya og balik. Naay nakadungog silingan saba daw kaayo amua (baboyan). Kami walay nakamata,” matod ni Peter sa iyang chat.

Ang baboyan nahimutang mga 100 ka metros gikan sa ilang balay ug naa sa lupa nga bahin sa ilang luna.

Sa iyang Facebook video post, si Jannifer Magno Saneo, igsuon ni Peter, nipakita sa daghang mga tunob sa ilang gituohan nga mga iro.

Apan di kini kasarangan og gidak-on kay dagko ang mga tunob sa tiil.

Base sa video, duna say usa ka iring nga diha sa gawas sa tangkal sa baboy nga giapil sa pagpatay.

Matod ni Peter nga di tawo ang nipatay sa mga baboy base sa ilang nakita sa mga samad kay agi sa hait nga mga ngipon ang marka.

Ang mga baboy dunay dagkong mga samad nga ang bangag padung sa nahimutangan sa atay ug kasingkasing sama sa gibalbal.

Ang kahibulongan kay wala silay mga silingan nga nagbuhi og dagkong mga iro.

Di usab kini unang hitabo sa dakbayan sa Toledo kay duna nay mga baka ug mga manok nga sama og paagi sa pagpatay, gikuhaan og atay ug kasingkasing, dugang niya.

Ang hitabo wa pa nila gi-report sa kapulisan.

Samtang sa miaging semana, dunay mga manok hiniktan ang nangamatay usab sa Toledo nga dunay mga dagkong samad sa lawas nga gituohan usab nila nga gikaon sa ungo.

Ang kapulisan sa maong siyudad mipasusi na sa nag viral nga post sa social media.

Si Police Lieutenant Colonel Dennis de Guzman, hepe sa kapulisan sa dakbayan sa Toledo, nagkanayon nga nagpadala na siya og imbestigador aron mokuha og impormasyon kon tinuod nga adunay ungo sa ilang siyudad.

“Pina punta ko na ang tao ko para mag imbestiga kung totoo yung balita na aswang ang gumawa, pero sa mga ganito malabo yan, pweding hayop din ang gumawa sa mga ganyan pero antayin natin ang imbestigasyon ng PNP,” matod ni de Guzman.

Wala pa usab madungog sa maong siyudad nga adunay tawo nga nabiktima sa ungo, sigun ni de Guzman.

Niadtong Disyembre 2020, daghang mga kanding sa Brgy. Malubog, bukirang dapit sa dakbayan sa Sugbo, ang gipamatay.

Uban sad nga mga hayop gikuhaan og ginhawaan.

Nahunong ra usab ang mga pagpamatay nga gidudahan sa pipila ka mga lumolupyo nga binuhatan sa “sigbin.”

Ang sigbin usa sa mga hayop sa kasugiran sa Pilipinas nga sama og porma sa kanding apan way sungay, dagko og mga dunggan ug taas og ikog ug mogawas lang magabii.

Giingong mosuyop kini og dugo sa iyang mga biktima.

Matag dunay pagpamatay sa mga hayop labina sa gabii ug gikuhaan og ginhawaan, ipasangil dayon kini sa publiko sa sigbin.