12 nanguna sa LET taga Da
DOSE ka mga gradweyt sa Davao Region nihiluna sa Top 10 sa 37,346 nga nikuha sa pasulit sa bag-ohay lang nga Licensure Examination for Teachers (LET) niadtong Hunyo 2022.
Kini base sa gipahibawo sa Professional Regulation Commission (PRC) niadtong Agosto 4, 2022.
Sa 12, lima kanila nanguna sa Secondary Level samtang ang pito sa Elementary Level.
Usa sa 12 nagsaysay nga wala siya magdahom nga mopasar gumikan sa mga kalisdanan nga iyang nasinati una ang gitakdang pasulit.
Ang 23-anyos nga gradweyt sa University of Mindanao-Davao City, Hannah Mae Abogada Antiola, Bachelor of Elementary Education batch 2019, nahimutang sa ika-sixth place uban ang iskor nga 90.20 porsyento kinsa kadaghan na nag-oktaba sa pagkuha sa pasulit tungod sa Covid-19 niadtong 2020 ug ang nipositibo niyang resulta sa swab, tulo ka adlaw una ang gitakda nga pasulit niadtong September 2021.
"Grabe nga preparation na unta ato for LET kay ready nako mo-take sa dihang nasango. Nag-review ko sa usa ka review center last September 2021 tapos mga May unta ang review na sad kaso tungod sa financial crisis kay hapit na sad ko manganak wala ko kaapil. So mao to self-study lang while on postpartum. Naapil ko sa June 2022 bag-o ra pa gyud ko nanganak mga two months pa lang nag-take nako," saysay ni Antiola sa paghinabi sa SunStar Davao kagahapon, Biyernes, Agosto 5, 2022.
Matud ni Antiola nga wala siya magdahom nga apil sa Top 10 examinees.
"Maong wa jud ko nagdahom nga ma-TOP 6 kay lisod baya kaayo nga magstudy while first time mom ka mangapa pa jud but Glory to God," tug-an ni Antiola.
Sa Elementary Level, Charline Tiquin Juntilla sa Compostela Valley State College-Montevista Branch niani og 93.40 porsyento ug nahimutang sa unang spot sa topnotchers.
Ubang nipasar mao nga gikan sa University of Southeastern Philippines-Davao City, Jennifer Candralo Lerasan nakakuha og 89.80 percent (eighth place), Khriza Lumando Maxey gikan sa Davao Oriental State College of Science and Technology, Cherie Leteral Mercado sa Rizal Memorial College ug Ferdinand Angelo Alipis Revilla sa Cor Jesu College (Holy Cross of Digos) nga naa sa ika-9th uban ang 89.60 percent, samtang si Meriambe Luma-ad Porio sa Davao Oriental State College of Science and Technology naa sa ika-10th spot nga dunay iskor nga 89.40 porsyento.
Mga 8,667 elementary nga magtutudlo nipasar sa 17,149 nga nikuha sa pasulit (50.54 percent) sa June 2022 LET.
Samtang naa sa unang luna sa Secondary Level mao ang gikan sa Compostela Valley State College-Montevista Branch nga si Marvin Cabel Nillas nga dunay iskor nga 94% kinsa giingong dunay relasyon sa nag-topnotcher sa elementary level nga si Juntilla.
Ubang nag-top mao si Redem Paul Manuat Yap sa Holy Cross of Davao College nga naa sa ikalima sa iskor nga 91 porsyento, ikapito mao si Jessa Fabiania MadreliƱo (90.40 porsyento) sa Saint Peter's College of Toril, Michael Sim Angelo Santos Lasay sa University of Mindanao-Tagum nga ikawalo (90.20 porsyento) ug Cyril Jasper Atienza Suarez sa HCDC nga naa sa ikasiyam nga puwesto sa iskor nga 90 porsyento.
Nipasar sa Secondary Level sa LET niabot og 10,193 sa 20,191 nga nikuha sa pasulit (50.48 porsyento).
Ang LET gihimo niadtong Hunyo 2022 sa daghang testing centers nga naa sa NCR, Baguio, Butuan, Cagayan de Oro, Cebu, Davao, Iloilo, Koronadal, Legaspi, Lucena, Pagadian, Pampanga, Rosales, Tacloban, Tuguegarao, Zamboanga, Bacolod, Cauayan, Dumaguete, Catanduanes, Catarman, Kidapawan, Jolo, Sulu, ug Tawi-tawi.