MGA pagkaon, hygiene kits, tubig, mga ukay-ukay ug daghan pa ang gidalit sa Davao City First Congressional District sa mga nasunogan sa Dumalag 1, Barangay Matina Aplaya, Davao City.
Kagahapon sa buntag ang anak ni Davao City 1st District Congressman Paolo "Pulong" Duterte nga si Rodrigo "Rigo" Duterte II ang midunol sa mga food packs ug daghan pa ngadto sa mga biktima sa sunog.
"Nag-provide si Congressman Pulong og food packs, mga grocery items ug gilauman ang financial assistance once nga ma-finalize na ang listahan sa CSWDO. Dako kaayo akong pasalamat nga ang mga amigo ni Congressman Pulong nag-donate pinaagi sa iyang programa nga Pulong-Pulong ni Pulong (PPP)," ingon ni Duterte II.
Gawas niini, lauman sab nga makadawat og laing financial assistance ang mga biktima sa sunog gikan sa panudlanan sa lokal nga kagamhanan sa Siyudad sa Davao.
Gawas sa 1st Congressional District nga ayuda, nang apud-apod na sab og mga kinarton nga mga grocery items ang Department of Social Welfare and Development (DSWD-Davao).
Subay sa inisyal nga datus sa Bureau of Fire Protection (BFP) anaa sa 120 ka mga panimalay ang naugdaw nga maoy naglangkob sa 174 ka mga pamilya.