ARON nga mas matubag pa ang panginahanglan sa mga indigent senior citizens giplastar na karon sa Department of Social Welfare and Development (DSWD) ang Implementing Rules and Regulation (IRR) labot sa dugang kantidad sa social pension nga ilang pagadawaton.
Ang edaran nga si Corazon Quisto, 67-anyos, nga taga Barangay 31-D Roxas Extension, Boulevard, Davao City dako ang iyang pasalamat gumikan sa nakalabay nga adlaw nahimo nang balaod ang dugang P500 sa ilang social pension.
Gikan sa P500 nahimo nang P1,000 ang pagadawaton nga ayuda sa mga lolo ug lola.
Luyo sa paghan-ay sa IRR gidugang ni DSWD Sec. Erwin Tulfo nga apil sa pangayuon nila sa Kongreso ang dugang pundo niini.
Naglaum sab ang edaran nga si Flora Reyes, 62-anyos, nga di lang unta P500 ang madugang kundi magpasar og balaod sa sapar kaayo nga kantidad.
"Gamay ra ang P500, pero mas maayo nalang kaysa wala. Mas maayo gyud nga bisan P3,000 aron makapalit kami og tambal, mga maintenance namo, unta maluoy ang gobyerno," ingon ni Reyes.