Editoryal: Baha, lunop mangtas na

Editorial art by Ariel Itumay
Editorial art by Ariel Itumay



Dili tiaw. Nagkagrabe ang problema sa baha o lunop. Bisan hamubo lang ang pagbunok sa uwan sama sa nahitabo pasado alas 7:00 sa gabii, Agusto 4, 2022 nga way oras gikan sa pagbundak sa uwan, ang dakbayan sa Sugbo ug ubang bahin sa Metro Cebu nahisama sa dagat.

Ang edipisyo ning mantalaan sa dalan P. del Rosario, Barangay San Antonio, dakbayan sa Sugbo murag naglutaw nga sama sa usa ka barko tungod sa nagpalibot nga tubig. Mga sakyanan ningtiurok taliwala sa lawom ug sulog nga baha sa dalan. Daghang napurwesyo. Mga sumasakay nagkutoy ang tiyan human nangatanggong.

Daghang naapektohan nga kabalayan. Naguba sa pagdahili sa yuta ug pagsuyla sa mga sapa ug suba. Gikatahong dunay nakalas nga kinabuhi. Ang rescuers nagkapuliki sa pagtubag sa mga alarma human halos tanang dapit dunay emerhensiya. Dili kini unang higayon. Ang nakalahi lang karon, nagkagrabe ang sitwasyon.

Samtang, minilyon nga pesos na ang nagasto gikan sa panudlanan sa gobiyerno sa mga proyekto nga gipatuman ubos sa nagkalainlaing administrasyon sa lokal nga kagamhanan. Apan tataw nga way padulngan ug way kapuslanan. Usik lang. Nakakomplikado sa problema mao ang pagpataka og labay sa mga basura ug ang daghang kabalayan sa kilid sa mga estero o sapa ug suba. Nisamot usab ang way political will nga liderato sa hingpit nga pagpatuman sa demolisyon ug relokasyon sa mga molupyo.

Mipatigbabaw gihapon sa problema mao ang walay tino ug malangkubong plano sa drainage system. Wa monunot sa paspas nga paglambo sa dakbayan ug pagburot sa populasyon. Ang mga nangaging proyekto basta-basta na lang aron dunay makita ang publiko? Gidudahan nga tinubdan pa kini sa korapsiyon. Maayo pa kon wala na lang.

Manawagan gihapon kita sa kagamhanan sa paghimo sa dako ug malahutayong proyekto alang sa hingpit nga kasulbaran sa problema sa nagkamangtas nga baha ug lunop sa tibuok Metro Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph