Tulo ka tuig na kong gideklarar sa akong oncologist nga ‘on remission’ kun cancer free apan hangtod karon lab-as pa gihapon sa akong panumduman ang akong pait nga kasinatian, pag-antos nga gibati ug sakripisyo sulod sa 2 ka tuig nakong pagbalikbalik patambal ug chemotheraphy sa akong sakit nga breast cancer.
Di lalim ang gastuhan ug di matukib akong nagsagol nga gibati labi na kay layo sab ko sa akong pamilya.
Sama sa ubang pasyente nga naay cancer, naupaw ko halos 2 ka tuig hangtod nahuman ang pagdapat sa isog nga medisina sa akong lawas, dali ra ko mag-sunggo o magdugo kon masamad, tanan nakong mga kuko sa tiil ug kamot nangamatay, daot, way ganang mokaon ug kanunay nga luya akong lawas.
Kaluoy sa Dios, na kompleto nako akong operasyon (mastectomy) ug patambal.
Akong bag-ong misyon karon mao ang pagtabang pagpasabot kon unsay angay bantayan kon naay manubong simtomas sa cancer aron sayong maagapan ug matambalan.
Una kining kanunay maimpatso o di matunawan, di mawala ang pagpanakit sa kaunuran, maglisod o sakit ipangihi, pagpamukol, pagbaga, bun-og, lagum-lagom o burotburot sa panit. Simtomas kini sa skin o blood cancer (leukemia).
Pagpamurot o enlarged sa lymph nodes sa may liog, kili-kili, singit, ilok o suso. Posibling mga senyalis kini sa breast cancer, ma lalaki o babaye.
Sunod ang lisod sa pagtulon, lisod iginhawa, di mawala o nagbalikbalik nga ubo o impeksyon sa baga, mga senyales sab kini sa cancer sa baga (lung cancer).
Ang kanunay o balikbalik nga pagpagawas sa basa nga hugaw o balikbalik nga sakit sa tiyan, kalit nga pag menus sa timbang, kanunay nga pagpanglapoy sa lawas bisag bag-ong mipahuway o way gihimong trabaho, dilikado sab kini sa colon o stomach cancer.
Kon kini imong masinati o naa kay nailhan nga dunay susama ini nga simtomas, ayaw paglangaylangay, magpakonsulta gilayon sa pinakaduol nga mananambal o tambalanan aron sayong maagapan.
Hinumdumi, ‘prevention is always better than cure’.