Ang Bureau of Fire Protection (BFP) 7 mapasalamaton sa suporta sa local government units (LGUs) atol sa pagsaulog sa ilang ika-31 nga kasumaran kagahapon, Agusto 5, 2022.
Si FSSupt. Fritzie Manatad, tigpamaba sa BFP 7, atol sa kalihukan nga gipahigayon sa Waterfront Cebu City Hotel and Casino, Barangay Lahug, siyudad sa Sugbo, nagkanayon nga ang BFP nahimugso human nabuwag sa kanhi Integrated National Police (INP) ug nahimong usa ka ahensiya sa kagamhanan.
Ang tema sa kasaulogan ning tuiga, “Bomberong Makabayan Serbisyo alay sa Mamayan”, diin gipasalamatan ang mga tawo nga nagpaluyo sa ahensiya ilabi na sa mga lokal nga kagamhanan sa kalungsuran ug mga siyudad sa Sugbo ug rehiyon.
Naglakip kini kang Talisay City Mayor Gerald Anthony “Samsam” Gullas, Kagamhanan sa Dakbayan sa Toledo ug lungsod sa Balamban, Kagamhanan sa Lalawigan sa Bohol sa ilang padayong pagsuporta sa paghatag og fire trucks ug mga gamit sa opisina sama sa computer sets, radio sets ug mga gamit sa pagresponde sa mga sunog.
AIR RESCUEGipasigarbo usab sa pangulo sa BFP-7 Fire Chief Supt. Jaime Ramirez nga ang BFP dunay 24 ka mga BFP personnel gikan sa Special Rescue Force (SRF) sa BFP Central Visayas nga mopailawom sa pagbansay aron sila ang usa ka team nga mamahimong Air Rescue Unit (ARU) sa BFP Central Visayas.
Ang pagbansay himuon sa probinsiya sa Siquijor ug ang maong team maoy magsilbing Air Rescue Unit sa BFP nga motubag panahon sa mga emerhensiya agi sa kawanangan. Mao kini ang labing unang Air Rescue Unit sa maong ahensiya.
Atol usab sa maong kalihukan, gihatagan og pasidungog ang Lapu-Lapu City Fire District nga napili isip Best Fire District sa Central Visayas.
Samtang ang probinsiya sa Bohol maoy gipili isip Best Provincial Fire Office. Ang Toledo City Fire maoy napili nga Best City Fire Station, samtang ang Panglao isip Best Municipal Fire Station.
Ang BFP 7 dunay 2,467 ka mga personnel samtang 295 niini mga bag-o. Dunay 23 ka mga Isuzu fire truck ang nahatag sa central office karong tuiga lang.
Sa tibuok Central Visayas, walo na lang ka mga munisipyo ang wala pay mga fire truck nga gipaningkamotan sa BFP nga makaangkon niini sa labing dali nga panahon.
Ang lungsod sa Alcantara nga dunay fire station wala pay fire truck. Ang Alcoy, Borbon, Ronda, wala pay luna nga gidonar alang sa usa ka fire station. Ang lungsod sa Santander niproseso na sa ilangdeed of donation.
Ang lungsod sa Tabogon sa Probinsiya sa Sugbo ug lungsod sa Duero sa Bohol duna nay mga luna nga gidonar ug nagpadayon ang pagproseso karon sa mga dokumento alang sa pagtukod sa fire station.
Samtang, ang lungsod sa San Miguel sa Bohol nagpadayon usab sa pagtrabaho sa ilang fire station.