Kalihukan sa ‘Pasigarbo sa Sugbo’ mosagop sa bag-ong pamaagi nga online voting alang sa pasundayag sa contingents.
Sanglit limitado ang makalantaw sa live performances sa contingents sa Pasigarbo sa Sugbo nga ipahigayon sa Cebu City Sports Complex (CCSC), mahimo na nga molantaw ang mga Sugboanon lokal o international sa mga kalihukan online.
Matod ni Cebu Governor Gwendolyn Garcia nga gawas sa pagtan-aw, dunay kahigayonan nga makahatag og puntos ang mga motan-aw online.
“Ang maong puntos o ranking, mahimong madugang sa overall score sa matag contingent. The remaining 20 points, this is about online impact much the way the American idol scores work. They will vote online after a series of performances, we will flash a QR code so that the viewer will be able to rank the performance. You will rate the performance on how you perceive them in terms of choreography theme, coordination and general overall operation,” pagpasabot ni Garcia atol sa pakighinabi sa mga tigbalita sa Agusto 5, 2022.
Gibuhat kini sanglit anaa lang sa 12,000 ang mahimong makasulod sa CCSC aron makakita sa live performance.
Gipasabot ni Garcia nga libre ang pagtan-aw sa maong kalihukan apan aron masiguro nga hapsay ang pagsulod sa mga motan-aw, adunay mga wristbands nga iapod ang kagamhanan.
Sa kasamtangan, padayon pa nga gisabutan sa kagamhanan ang kantidad sa premyo nga madawat sa mga mananaog apan gibutyag ni Garcia nga posibleng molabaw pa kini sa usa ka milyon ka pesos.
“I will still have to decide what the prizes will be it would have to be more than P1 million,” dugang niya.
Pagsiguro nga dili usab maghuot sa kadalanan atol sa street dancing, gihan-ay na usab niini ang traffic route ug ang seguridad sa tanan.
Ang mga mananayaw kasamtangan kining mopasilong sa mga tunghaan nga gigahin sa Department of Education (DepEd) ug sa Kagamhanan sa Dakbayan sa Sugbo.
Dako og panglantaw si Garcia sa paglampos sa maong kalihukan sanglit maisip nga pagbanhaw kini gikan sa tulo ka tuig nga nahunong ang mga kalihukan sa Pasigarbo sa Sugbo tungod sa nasinating pandemya ug kalamidad.
Nagpasalamat ang gobernador nga niining paagiha, mahatagan og trabaho ang industriya sa mga make up artist, mga dance instructor ug uban pa samtang nag-atubang sa krisis tungod sa pandemya.
Ang Pasigarbo sa Sugbo ipahigayon sa Agusto 28, 2022.