Moabot ngadto sa 20 ka mga balay ang nadanyos sa baha nga nasinati sa dakbayan sa Sugbo gumikan sa kusog nga bundak sa uwan niadtong gabii sa Agusto 4, 2022.

Si Raquel Bohol-Arce, acting department head sa Cebu City Disaster Risk Reduction and Management Office (CCDRRMO), nibutyag nga 13 ka mga balay ang partially damaged ug pito ang hingpit nga nabanlas sa baha.

Moabot usab ngadto sa 13 ka mga insidente ang gitubag sa CCDRRMO nga gilangkuban sa landslide, flooding, rescue operations ang na-report gikan sa 9 ka barangay.

Ang CCDRRMO nagkanayon nga walay nakalas sa mga insidente nga ilang gi-respondehan apan aduna silay naluwas nga kinabuhi human naanod si Basil Baylosis, 24, taga Barangay Duljo Fatima alas 11:17 sa gabii ug apil sab sa na-rescue ang iyang asawa.

Aduna say pito ka mga tawo ang na-trap sa baha sa Sityo Bukog sa T. Padilla, Sityo Tambisan sa barangay Tisa; sityo Purok Sambag, Tisa; Sityo Langob sa Buhisan; Sityo Boracay sa Tisa; Sityo Tres de Abril sa Labangon; ug Sityo Lower sa Carreta.

Ang CCDRRMO kauban ang Bureau of Fire Protection ug Philippine National Police nakapahigayon usab og upat ka rescue operations sa Kinalumsan River, La Paloma sa Tisa, Butuanon River, Asian Arts sa Labangon, Metropolis paingon sa Barangay Pit-os; Lower Sindulan sa Barangay Mabolo; ug niawas ang sapa sa C. Padilla paingon ngadto sa Gaisano Jai Alai.

Sa report sa CCDRRMO, 11 ka mga pamilya kun 93 ka mga individual sa Barangay Tisa sa south district ang apektado sa grabeng baha sa Sityo Purok Sambag.

Ang CCDRRMO nipahibawo usab nga dili maagian og sakyanan ang Sityo Langob sa Buhisan gumikan sa landslide ug adunay partial obstruction sa Barangay Busay gumikan sa mga bato nga nangaligid apan nasolusyonan ra kini.

Samtang, ang kagamhanan sa dakbayan sa Mandaue niawhag sa mga Mandauehanon sa pagtabang sa pagsulbad sa problema sa baha matag bunok sa uwan sama sa nahitabo sa Huwebes sa gabii.

Si Mandaue City Mayor Jonas Cortes nibutyag ngadto sa mga reporter nga ang nagtumaw nga problema sa daling baha kabahin sa climate change ug tungod usab sa walay pagpakabana sa paglabay sa mga basura. (PAC, HIC)