Walo ka buwan human nilabay ang bagyong Odette sa Disyembre 2021 hangtod sa kagahapon, Agusto 5, 2022, padayong nagkaproblema ang Department of Education (DepEd) sa dakbayan sa Sugbo bahin sa ilang nagubang classrooms. Ang limited face-to-face (F2F) classes magsugod na sa Agusto 22, 2022.

Gikan sa 840 ka mga classroom nga giguba ni Odette, 156 pa niini ang naayo pinaagi sa Local School Board (LSB) sa Cebu City Government.

Si Dr. Bernadette Susvilla, assistant division superintendent, nagkanayon nga nagpadayon ang pagpangandam sa 126 ka mga tunghaan sa public elementary ug high school ubos sa Brigada Eskwela program alang sa pag-abli sa limited F2F classes.

Apan gipadayag ni Susvilla nga human sa Oktubre 31 nga maoy katapusang adlaw sa limited F2F, ang DepEd Cebu City dili pa andam sa ipahigayon nga full F2F classes para sa 172,491 ka mga tinun-an sanglit dili pa magamit ang 684 ka mga classroom kay nangaguba ang mga atop.

Sa kasamtangan, ang DepEd Cebu City nagkinahanglan og 5,153 ka classrooms apan 4,726 lang niini ang napatukod sa DepEd ug City Government ug nisamot nga nagkuwang gumikan sa pagkaguba sa bagyong Odette.

Matod ni Susvilla, ang DepEd Cebu City nagkinahanglan og P330 milyunes para sa pag-ayo sa 840 ka classrooms apan, ang pundo nga ilang nadawat gikan sa DepEd anaa pa sa P3 milyunes nga igo rang ipa-repair sa tulo ka classrooms.

Nirekomenda na sila nga ang DepEd Cebu City mopatuman sa limited F2F hangtod matapos ang school year 2022-2023 sanglit di pa maka-accomodate ang classrooms sa bul-og sa mga tinun-an nga moadto sa ekswelahan apan wala pa kini pagtugot gikan sa DepEd Central Office.