Upat ka mga Korean national nga nag-operate og illegal online gaming ug online dating sites sa usa ka condominium sa Barangay Lahug, siyudad sa Sugbo, gironda sa kapulisan pinasikad sa search warrant nga giluwatan sa korte sa alas 8:00 sa buntag, Biyernes, Agusto 5, 2022.
Ang mga operatiba sa Criminal Investigation and Detection Group (CIDG) Lapu-Lapu City Field Unit uban sa Regional Field Unit, armado og search warrant nga giluwatan ni Judge Ramon Daomilas sa Regional Trial Court Branch 11 sa Cebu City sa Sugbo batok kang Taewoong Kang, 42, taga Gwang Ju, South Korea.
Sa pagsulod sa condo unit, naabtan ang laing tulo ka mga Koreano nga sila si Jung HowWon, 41, Kim Dae Hyeon, 36, ug Park Ji Sung, 40.
Nakuha nila ang 18 ka computer sets, 11 ka cellular phones, 9 ka one time password generator (OTPG), 7 ka wifi routers, 120 ka sim cards nga maoy gamiton sa pag-scam, 30 ka USB, ug uban pa nga electronic devices.
Matod ni Police Captain Nigel Sanoy, hepe sa CIDG Lapu-Lapu City Field Unit, ang modus sa maong mga Korean national mao ang online gaming sama sa pogo, online dating sites ug uban pa nga matang sa scam diha sa internet diin ang ilang biktimahon ang ila ra usab nga kaubang Koreano didto sa ilang nasud.
Haylohon nila ang ilang biktimahon nga mo-invest sa usa ka kompaniya apan sa dihang makahatag na og dakong kantidad ang biktima, kalit nga mawagtang ang site.
“Ang ilahang trabaho kini ra gyud ang online gaming, online dating sites so mga Korean national gihapon ang biktima nila didto sa Korea, mga online gambling ug kanang fishing, kanang magpadala silag text nga naay link and pag nag click ka sa ilang link, dad-on ka sa ilang site didto na ma hack ang atong mga bank account. Mao nang naay mabiktima nga na scam,” matod ni Sanoy.
Gitug-an ni Sanoy nga nagsugod sila sa ilang monitoring sa maong illegal nga operation ni Taewoong Kang niadto pang Pebrero 2022 ug karon lang sila nakahigayon sa operation tungod sa kalisud sa pagsulod sa condominium.
Nasuta hinuon ni Sanoy nga walay kunsabong mga Pinoy ang maong mga Koreano diin sila-sila lang ang nagpadagan niini sulod sa 24 oras.
Dili hinuon matawag nga dakong grupo ang ilang nadakpan, apan matod ni Sanoy, daghan ang nagpahigayon sa maong illegal nga online gaming nga nagbase sa Pilipinas.
“I cannot say nga big group sila but I can assure you nga daghan ni sila which is similar gihapon,” dugang ni Sanoy.
Sa monitoring sa kapulisan, nagsugod sa ilang operation ang maong mga Koreano sa 2019 ug dinhi sa nasud sila naghimo niini tungod kay dali sila ma-trace sa South Korea.
Kasuhan sila sa kalapasan sa Republic Act 8484 kun Access Devices Regulation Act of 1998 nga giamendar sa Republic Act 11449. (AYB / BBT)