Parehong adunay away karong tuiga ang duha ka boxing superstars nga silang Floyd Mayweather Jr. ug Manny Pacquiao sa managlahing buwan dinhi sa Asya.
Si Mayweather mobiyahe paingon sa Japan karong Septiyembre alang sa laing exhibition match batok sa mixed martial arts fighter Mikuru Asakura.
Ang ilang away gipahibawo sa miaging adlaw sa RIZIN Fighting Federation pinaagi sa usa ka press conference apan wala pa ibutyag sa publiko ang rules sa duwa ug pila ka rounds ang ilang himuong exhibition fight.
Ang gitawag og “Money” motikang sa ring uban sa 29 anyos nga MMA fighter kinsa kanhi two-division MMA champion. Kini maoy ikaupat nga higayon nga nisaka sa boxing ring si Mayweather human siya niretiro lima na ka tuig ang nakalabay.
Si Asakura adunay 16-3 MMA record ug masaligon nga dili siya mahisama sa iyang kaubang Hapon nga gi-knockout ni Mayweather sulod lang sa 3 minutos pipila na katuig ang nakalabay.
“My name is Mikuru Asakura and I’ll be facing Floyd Mayweather,” matod pa sa Hapon.
Si Mayweather niretiro nga adunay 50-0 human niya gipilde si UFC star Conor McGregor niadtong 2017 ug human niadto pulos na exhibition fight ang mga away ni Floyd.
Ang away sa Amerikano ug Hapon ipahigayon karong Septiyembre 25 sa Saitama Super Arena sa Tokyo nga maoy lugar nga giawayan ni Mayweather sa iyang unang entertainment fight sa nasod.
Apan dili lang si Mayweather ang mopakita og labok karong tuiga sa boxing ring sanglit si eight-time division world champion Manny Pacquiao moaway usab ubos sa exhibition fight batok ni Korean YouTuber DK Yoo sa Disyembre.
Si Pacquiao kinsa adunay 18 milyones nga followers sa Facebook makigkontra sa martial artist nga si Yoo kinsa adunay 654,000 nga followers sa YouTube. Si Yoo personal nga nianunsyo pinaagi sa iyang channel diin nakita usab si Pacman.
Ang away ni Pacman maoy labing una niyang exhibition fight human siya niretiro sa boksing niadtong 2021 aron motutok sa iyang karera sa pulitika apan walay palad sa iyang pagpapili pagka-presidente sa Pilipinas niadtong May 9, 2022 elections.
Ang kita ni Pacquiao sa maong away maoy iyang kuhaan para itabang sa mga kabos aron iyang mapatukoran og mga balay dinhi sa nasod.