Ang bag-ong pangulo sa Philippine Sports Commission niingon nga ang Philippine Athletics Track and Field Association (Patafa) nipahibawo sa Philippine Sports Commission nga ilang i- reinstate si EJ Obiena ngadto sa national team.

Si Patafa chief Terry Capistrano maoy nipahibawo sa maong balita sa iyang opisina ug nibutyag nga ang Patafa niindosar kang Obiena aron siya matagaan og allowance nga kanhi iyang gidawat base sa iyang kapabilidad isip usa ka world class athelete.

Ang endorsement sa Patafa mahinangpon usab nga gidawat ni PSC OIC Guillermo Iroy.

“I see no problem with the endorsement, EJ deserves to be back in the team. The agency is checking policies and records like the NSA quota or team ceiling for one and will be doing the necessary paperwork,” matod ni Iroy.

Ang OIC sa PSC nagkanayon nga kon ang slot alang kang Obiena nagamit na, mahimo silang modugang.

Kon kinahanglanon nga aprobahan sa PSC board ang slot, matod pa ni Iroy nga mo-retroact ra ang allowance nga madawat ni Obiena.

Si Obiena nibuak sa Asian record sa iyang bronze winning jump sa 2022 World Atheltics Championship didto sa Oregon, USA niadtong Hulyo.

Ang Patafa nagkanayon nga kini makadugang sa kadasig sa mga atleta alang sa umaabot nga international competition nga nag-apil sa 2024 Summer Olympics sa France.