Kapulisan sa siyudad sa Sugbo makig-alayon sa mga barangay official ug sa Cebu City Social Welfare and Services aron masulbad kining paggamit sa mga durugista sa mga menor de edad sa ilang pagpamaligya og illegal nga drugas.
Sa hulagway nga gipadala ngadto sa mga tigbalita, makita nga dunay grupo sa mga bata nga namaligya og pinutos sa gituohang shabu sa ilang kustomer nga nagmotorsiklo sa sitio Alaska, Barangay Mambaling, Siyudad sa Sugbo.
Gituohan nga ang maong mga bata gisugo sa mga drug player sa maong lugar nga maoy motunol kon dunay mokuha og illegal nga drugas sanglit kon adunay dinakpanay, dili man sila mapriso ug mapasakaan og kaso.
Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), nga iyang ipatawag ang attention sa hepe sa Mambaling Police station uban sa barangay officials aron mahatagan sa dinalian nga pagtagad ang paggamit sa mga bata sa illegal nga kalihukan.
Makig-alayon usab sila sa laing ahensya sa gobyerno sama sa CSWS sanglit sila ang adunay katungod nga mohawid sa maong kaso nga naglambigit sa mga menor de edad.
“Atong ipatawag ang attention nasad sa atong hepe to make immediate action to that report. We have also to ask the assistance of the other agencies like DSWD or CSWD of the city and the barangay officials diha sa area sa Mambaling,” matod ni Parilla.
Gibutyag ni Parilla nga makadaghan na nga naka rescue ang kapulisan sa mga bata nga gigamit sa illegal drug activities sa Alaska, Barangay Mambaling apan karon nibalik na usab sila sa maong matang sa modus.
Kon masuta nga mga anak og Badjao ang nakita sa hulagway, makigtagbo ang kapulisan sa mga leader niini aron sila na usab mismo ang mobantay nga dili magamit ang ilang kabataan sa illegal nga kalihukan.
Una nang nipahibawo ang Philippine Drug Enforcement Agency 7 nga dunay daghang mga menor de edad nga gipanggamit sa mga durugista sa ilang illegal nga negosyo sanglit nasayod sila nga walay kaso nga mapasaka ang kapulisan kon sila madakpan sa operations.
Gihulagway hinuon ni Parilla nga dili pa alarming ang maong insidente sanglit mahimoan man usab nila kini og aksyon diin molusad silag rescue operation alang sa maong mga bata.