Sa pagsugod pa lang sa Covid-19 pandemic, nag-anam og kadaghan ang mga tawo nga nagbiseklita sa karsada. Duha ang tumong niini. Una, pag commute nga di masagol sa daghang mga tawo taliwa sa pagsulbong sa mga kaso sa Covid-19.
Ikaduha, mao ang pag-ehersisyo aron molig-on ang immune system batok sa bisan unsang sakit. Proven na man nga ang exercise, basta di lang palab-anan, makapalig-on sa immune system.
Wa lang nahitabo ni sa Pilipinas, kon di sa tibuok kalibutan, labina sa Western countries. Duna guy shortage sa branded bikes sa Europe ug United States nga kon mo-order ka, maghuwat ka og pipila ka mga buwan. Dinhi lang sa ato, dunay gamay nga shortage but wa kaayo makadako tungod kay duol man kita sa manufacturing hubs sa mga biseklita, China ug Taiwan.
Kon tig bike ka or tig bike ka kaniadto, makakita ka sa nagkadaghang nagbiseklita labina kon naanad ka og sayo sa karsada. Kini indikasyon sa nagkadako nga biking community.
Kaniadto maihap lang ang mga batan-on nga tigbiseklita, apan karon, nakabantay na ko nga bisan teenagers daghan kaayo sa karsada. Maora bag ang pag biseklita is a cool lifestyle. Tinuod, cool and healthy lifestyle ang biking, labina karon nga daghan sa atoang mga pagkaon ‘rubbish.’
MANAGHAN PA
Di lang tungod sa traffic nganong managhan pa ang mga biseklita ug electric bikes. Kini tungod usab sa environmental impact sa mga sakyanan nga naggamit og fossil fuel. Nagtuo ko nga anam nga magkausab ang panan-aw sa liderato sa kagamhanan ug private sector kon mosulod na ang mas batan-ong henerasyon.
Ang younger generation, sugod sa generation X diin ko nahisakop, mas nakasabot sa environmental impact sa mga sakyanan. Kon nag-anam na og ka uso ang electric bikes sa sektor sa mga kabus, ang biseklita nga mas healthier ang epekto, managhan pa.
Kon magkataas ang demand sa umaabot, magkaanam pa ni og ka mahal. Samtang affordable pa ang biseklita karon, apil na ang branded nga bikes, mas maayong hinayhinay nga mo-invest og usa.
Anyway, di man madunot ang biseklita bisan pag 10 ka tuig na ni. Lahi sa mga de makina nga kon di padaganon og pipila ka mga buwan, madaut na.
DAGHANG GAMIT
Sa una, ako nang gikwenta ang kadak-on sa imong ma-save sa biseklita kon gamiton sa pag commute sa matag adlaw. Kon imong ma save ang pletihan kada adlaw, lami kaayo ka og Pasko ug New Year.
O di man gani, maka open og bank account o di man gani, magamit nga puhonan alang sa sari-sari store, pangdugang sa income labina karong panahuna.
Unya, talagsa ka ra sab masakit kay nagsige man ka og exercise. Makahilis sa cholesterol ug fats, mopa-develop pa sa immune system kay mo-respond ang lawas nga maorag dunay miatake sa lawas, matod sa mga pagtuon.
Kon nakatigom ka sa pletihan, naa kay ma save alang sa imong gasto sa tambal ug doktor.
Kon wa ka pa takdi sa bike craze, patakod na.