Usa ka 37-anyos nga bookkeeper nga dunay mga kasong estafa gidakop niadtong Biyernes sa buntag, Agusto 5, 2022 sulod sa ilang balay sa Barangay Gabi, lungsod sa Cordova, Cebu pinasikad sa warrant of arrest sa korte.

Si Corporal Roy Roberts, warrant server sa Cordova Police Station, niila sa akusado nga si Marilyn Regner, minyo, taga Barangay Gabi.

Si Roberts nitug-an sa SunStar Cebu nga si Regner maoy no. 3 most wanted person sa municipal level.

Si Regner gidakop mga alas 10:15 sa buntag sa Biyernes samtang siya naglingkod ug nakigsulti sa iyang pamilya sa ilang sala.

Niadtong Disyembre 2019, gi-hire si Regner isip bookkeeper ug encoder sa samang higayon aron magtipig og mga rekord sa pinansyal nga mga butang sa usa ka resort sa Bangkal, Lapu-Lapu City.

Giingong sa mao nga higayon iyang gikawkaw ang kontribusyon sa Social Security System (SSS) sa mga empleyado nga nagkantidad og P50,000.

“Gipaatubang ni siya nga naay abogado para i-settle nila ug papirmahon siya nga mobayad pero wala niya natuman mao to gikasohan siya unya nalutsan siya og warrant,” si Roberts niingon.

Si Judge Genevieve Lawas niisyu sa warrant of arrest sa walo ka mga kasong estafa niadtong Hulyo 28, 2022 nga adunay girekomendar nga piyansa nga tag P36,000 matag usa kun P288,000 sa kinatibuk-an.

Si Regner sa interview sa SunStar niadtong Biyernes, niingon nga iya kining nabuhat niadtong higayuna kay di maayong mosuweldo ang resort.