Lalaking kaupat na nagsulod gawas sa prisohan sa kaso sa illegal drugs gipusil patay mga alas 4 sa Sabado sa hapon, Agusto 6, 2022 sa sityo Fatima, Barangay Kamagayan, Dakbayan sa Sugbo.
Ang biktima nga naglingkod lang sa lingkuranan dihang gipusil sa riding in tandem mao si Jayson Samson Borces, 28, lumad nga taga Barangay San Jose, bukirang dapit sa dakbayan sa Sugbo.
Si Borces nagpahuway sa daplin sa karsada sa Sityo Fatima, naglingkod sa bangko dayong bundak sa uwan nga mao say pag-agi sa duha ka killers nga nagmotorsiklo, diin ang angkas nipusil kaniya sa makadaghan.
Matud ni Police Executive Master Sergeant Rommel Bancog sa Parian Police Station, kinsa maoy nag-imbestigar sa pagpamusil, nibutyag nga si Borces naigo sa aping ug liog nga maoy hinungdan sa iyang hinanaling kamatayon.
Dugang ni Bancog nga upat ka mga kabhang sa bala sa wala pa matino nga kalibre sa armas ang nagpasad sa crime scene.
Ang kapulisan sa Parian Police Station mosubay una sa personal nga anggulo nga posibleng motibo sa pagpatay samtang makig-alayon pa usab sila sa Talamban Police Station aron masusi ang pagkatawo sa biktima.
Ang kapuyo niini nga si Irjo Goopio nikompirmar sa Sunstar nga kaupat na napriso si Borces, tulo niini kalapasan sa Section 11 ug 12 ug usa ka kaso sa Section 5 ug 11 sa Republic Act 9165 kun Comprehensive Dangerous Drug Act of 2002.
Dugang ni Goopio nga sa ilang tulo ka tuig nga pag-ipon, wala siya nagkuwang sa pagpahimangno nga magbag-o na si Borces kay kaupat na siya nakagasto sa piyansa.
Samtang ang igsuon ni Goopio nga si Hazel Cabatingan nibutyag nga buotan si Borces.
Wa usab nisulti ang biktima kon duna bay nakaaway hinungdan nga wala sila magdahum sa hitabo.