Mokabat sa 15 sa 80 ka mga barangay sa Dakbayan sa Sugbo ang gibahaan niadtong Huwebes sa gabii hangtod sa Biyernes sa kaadlawon, Agusto 5, 2022 taliwa sa pagbunok sa uwan.

Hinuon, usa ray gikatahong naangol sa mga hitabo nga gipangrespondihan sa Cebu City Disaster Risk Reduction and Management Office (CCDRRMO), Bureau of Fire Protection (BFP), kapulisan ug barangay disaster response teams.

Mokabat sa 47 mga pamilya kun 235 ka mga individual ang naapektuhan sa mga baha ug landslides.

Base sa taho sa CCDRRMO nga gipangulohan ni Raquel Arce, 26 ka mga insidente ang gipangrespondihan taliwa sa mga pagbaha.

Mokabat usab sa 50 ka mga balay ang nangaguba. Sa mao nga gidaghanon, 41 ang partially damaged samtang siyam ang hingpit nga nangaguba.

Ang labing daghang mga apektadong balay nagagikan sa Barangay Buhisan, bukirang dapit sa Dakbayan sa Sugbo.

Ang gikataho nga naangol mao ang usa ka tawo nga gianod sa Kinalumsan River sa Brgy. Mambaling sa Huwebes sa gabii, apan naluwas ra usab sa mga rescue personnel sa Dakbayan.

Duna usay gipangluwas nga mga tawo nga nanga-trap sa baha sa sityo Tambisan, Purok Sambag sa Brgy. Tisa; sityo Bukog, Brgy. T. Padilla; sityo Langub, Brgy. Buhisan; sityo Boracay ug sityo Bacayan sa Barangay Labangon; ug sityo Lower, Barangay Carreta.

Duna usay gipabakwit makadiyot sa mga lumolupyo sa Barangay Bacayan tungod sa pagsuyla sa Butuanon River.

Dali silang narespondihan ug naluwas sa mga barangay rescue personnel, officials, BFP ug kapulisan.

Gipabalik ra usab dayon sila pagkutat na sa baha.

Ang baha nagagumikan sa low pressure area (LPA) nga nahimutang sa Samar ug sa southwest moonsoon kun habagat apan sa taho sa Philippine Atmospheric Geophysical Astronomical Services Administration (Pagasa) sa mga alas 3 sa hapon sa Sabado, ang LPA toa na sa Luzon.

Hangtod sa Sabado, Agusto 6, nagpadayon pa ang kusog nga mga pag-uwan, labina sa mga bukirang dapit sa dakbayan sa Sugbo nga dala sa Habagat.

Nagpahimangno gihapon ang mga awtoridad sa posibleng mga landslide.