GIPATUTUKAN ni Midsayap Cotabato Mayor Rolly Sacdalan ang mga programa alang sa mga senior citizens sa lungsod.
Nasayran nga bag-ohay lang nakadawat og ayuda ang mga seniors sa Midsayap.
Mokabat sa 466 ka mga senior citizens gikan sa 19 ka barangay sa lungsod nakadawat og tag P1,000 nga hinabang matag usa ubos sa Assistance and Incentives for the Development of Elderly (Aide) Program.
Kini ang ikaduhang hugna sa mga benepisyaryo sa nasangpit nga programa.
Ang Aide Program usa ka inisyatiba sa lokal nga panggamhanan sa Midsayap sa pakigtambayayong sa Municipal Social Welfare and Development Office ngadto sa mga senior citizens nga nag-edad og 80 pataas.
Katuyoan niini nga mahatagan sila og dugang mga suplay alang sa ilang inadlaw nga panginahanglan.
Samtang dako sab ang pasalamat sa mga benepisyaryo tungod kay dako kini nga tabang alang kanila.
Ang programa posibleng ipatuman sab sa ubang dapit sa nasud ilawom sa LGU sa pakig-alayon sa Office of the Senior Citizens Affairs ug Department of Social Welfare and Development.