TEMPORARYO nga sirad-an sa City Transportation and Traffic Management Office (CTTMO) ang 21 ka mga interseksyon alang sa Indak-Indak ug Pamulak sa Kadayawan float parade karon Agosto 20-21, 2022.
Kini ang gibutyag ni CTTMO head Dionisio Abude atol sa I-Speak Media Forum, diin suma pa ila nang gisumite ngadto sa Sangguniang Panlungsod ang mga rota alang sa pagsirado para sa Kadayawan Festival.
Base kini sa parade route nga gihatag sa City Tourism and Operations Office.
"Naa ta'y expanded regulated closure na mag-start along Jacinto corner Aurora, Pag-asa, Corner Padre Gomez, Corner Padre Faura then Zamora. Regulated sila kay kung dili mo-cross diretso sa Roxas so pwede sila makasulod pero kutob ra sila didto," sumala ni Abude.
Matud pa ni Abude nga ilang nakita ang panginahanglan nga palapdan ang pagsira sa karsada tungod kay kaniadto, ang mga sakyanan nga mosulod sa Jacinto lagmit ma-trap tungod sa pagsira sa Roxas Boulevard paingon sa Claro M. Recto (Claveria).
Dugang sa opisyal nga ang 21 ka mga intersections sirad-an nga mao ang paingon sa Roxas Boulevard padung sa Pichon: ang mga eskina sa Bolton, Anda, ug Pelayo; alang sa Mabini: Aurora Quezon, Padre Gomez, Pag-asa, ug Padre Faura. Lakip usab ang mga eskina sa Ramon Magsaysay ug Camus.
Matud ni Abude nga ang mga lugar alang sa Indak-Indak exhibition mao ang Veterans Rotunda nga nahimutang sa eskina sa C. Bangoy Street, Ramon Magsaysay Avenue, ug Roxas Avenue; ang eskina duol sa Apo View ug San Pedro Square.
"With the duration of the activities sa Kadayawan, naa ta'y 980 ka personnel," sulti ni Abude.
Matud niya nga ang CTTMO kabahin sa integrated safety and security plan para sa Kadayawan. Ang dugang nga mga update sa giaprobahan nga pagsira sa dalan mahimong ma-access sa City Government of Davao Facebook Page. (Uban sa taho sa City Information Office)