Nakalangkat na sab og titulo si Filipino triathlete August Benedicto human niya gipatigbabawan ang men’s division sa Megaworld Ironman 70.3 Philippines kagahapon, Agusto 7, 2022, sa Mactan Newtown sa dakbayan sa Lapu-Lapu.
Taudtaod man tuod nga wala siya nakakombati ning maong kompetisyon gumikan sa Covid-19 pandemic apan gipakita sa 38 anyos nga si Benedicto nga wala gihapon matay-i ang iyang kapabilidad.
Mirehistro siya og oras nga 4:29:16 aron angkunon ang ikalima niyang overall men’s title.
Human sa lumba, nagpasalamat si Benedicto sa Kahitas-an ug sa abiba ug suporta sa mga Cebuano sa triathletes nga sama kaniya.
Gipasabot ni Benedicto nga ang abiba sa mga tawo makahatag kanila og dugang enerhiya ug kadasig sa pagtiwas sa malisod nga lumba.
Si Benedicto, kinsa nagbase na karon sa Germany, katapusang nisalmot og Ironman event sa Cebu niadto pang 2019 diin igo lang siyang nahiluna sa ikaduha.
Apan sa sayo pa, naghari si Benedicto sa kompetisyon niadtong 2012, 2014, 2015, ug 2016.
Gipasabot ni Benedicto nga nalingaw gyud siya ning higayuna hilabi na dihang gisubay niya ang bag-ong CCLEX bridge sa bike event.
“I’m very happy about the new bridge and I feel safe riding on the road,” asoy ni Benedicto.
“I enjoyed the race and I’m very happy of my win and my time.”
Si Aussie Mark Jansen maoy nilabni sa ikaduhang dapit pinaagi sa oras nga 4:36:05 unya ikatulo si JD Alcala, kinsa mitali og 4:37:54.
Sa laing bahin, si Ines Santiago maoy mikuha sa overall title women’s title pinaagi sa oras nga 5:23:14. Nagsunod kaniya mao sila si Leyan Ramo (5:32:00) sa ikaduha ug Cebuana Cianyl Jam Gonzalez (5:36:09) sa ikatulo.