Nabalaka ang mga molupyo sa Barangay Canlumampao, siyudad sa Toledo nga mobalik og ataki ang gidudahang balbal nga nipatay sa upat ka mga baboy ug pagka angol sa usa sa miaging semana.
Si Joonrey Magno Regasajo, tag-iya sa tulo ka mga baboy nga gipangkuhaan og atay ug kasingkasing, nipadayag sa kahadlok uban sa iyang mga silingan nga dili na hayop ang sunod nga biktimahon, mga bata na.
Gitug-an ni Regasajo atol sa pakighinabi ni Manlalaban Ruphil Fernandez Bañoc sa programa sa sibyaanan dyHP RMN Cebu, nga dili lang kato ang unang higayon nga adunay mga hayopan nga namatay nga gituohan nila nga gibalbal usab.
“Kinahanglan nga masumpo ni kay basin kuno nga dili na hayop ang sunod nga mahitabo, mga bata na,” matod ni Regasajo.
Nagtuo usab sila nga konektado ang nahitabong pagkamatay sa mga kanding, baka ug mga manok niadtong 2020 sa silingan niini nga barangay sa Canlumampao.
Matod ni Regasajo, kon itandi ang mga nangamatay nga mga hayop, susama ra ang gidangatan sa ilang mga baboy.
Lakip sa iyang nabantayan nga wala magpasad ang dugo sa salog sa ad sa baboy nga gituohan nga gisuyop kini sa balbal.
Giangkon niya nga adunay lakra sa tunob sa iro sa luyo sa ad sa ilang baboy apan ang ilang gikatingad-an kay dagko kini itandi sa mga kasarangang iro sa ilang barangay.
Dako gyud ang iyang pagtuo nga ang naghimo niini nagpa iro-iro nga naa namuyo sa libon ug kawayanan sa luyo sa ilang balay.
Apan dunay ilang silingan nga nakakita, matod pa, nga naay lima ka iro nga dagko kaayo nga gilutos na kaniadto tungod kay nakapatay usab kinig mga hayop apan kalit lang nga mawagtang kon maka siot na sa kalibonan.
Si Jeffrey Elibera sa City Agriculture Office sa Toledo nga maoy usa sa mga misusi sa mga baboy, dili usab makatuo nga iro ang nagpatay niini.
Matod niya, kung iro ang nagkaon o nagpatay sa maong mga baboy, magpasad unta ang dugo apan wala silay nakita sa ad nga maoy nakapatingala nila pag-ayo.
Nagtuo gyud sila nga gibalbal ang mga baboy tungod kay ang gipanguha ang kasingkasing raman ug ang atay.
“Murag balbal man, sir, lain man gud ang punterya sa hayop nga pagka dapata, Sir, kay bungkag-bungkag man gud nya ang kasagaran nga gikuha ang kasingkasing ug atay sa baboy,” matod ni Elibera.
Niawhag sila sa kapulisan ug sa barangay nga mahatagan kinig pagtagad tungod kay nabalaka sila nga kon mobalik sila sa pagpamuhi og baboy, susama ra ang dangatan niini.
Si Police Sergeant Marciano Suarez, imbestigador sa Toledo City Police Station, nagkanayon nga ila nang gisubay ang maong insidente.
Matod ni Suarez, iro nga gutom nga naa nagpuyo sa kakahuyan sa barangay, ang nagpatay sa maong mga baboy ug dili balbal.
Tungod sa maong insidente, nakig-alayon ang kapulisan sa Toledo tali sa mga opisyal sa barangay aron mahatagan og ayuda ang tag-iya sa mga baboy.
Lakip sa ilang tukion mao ang pagsulbad nga dili na masubli pa ang maong hitabo ilabi na nga daghan pa nga mga baboy nga gipangbuhi sa mga molupyo sa maong barangay.