Nakapabuto og three-point bomb si Jayson Castro sa nahabiling duha ka mga segundos aron agakon ang Talk N’ Text (TNT) Tropang Giga sa makutas nga kadaugan batok sa Magnolia Chicken Timplados Hotshots, 93-92, sa Game 3 sa 2022 Philippine Basketball Association (PBA) Philippine Cup semi-finals series kagabii, Agusto 7, 2022, sa Smart Araneta Coliseum.
Sa kadaugan, nakuha og balik sa Tropang Giga ang bintaha sa best-of-seven series, 2-1.
Nag-ung-ong na unta sa pultahan sa kadaugan ang Hotshots human nakamugna og upat ka sunodsunod nga mga puntos si Mark Barroca nga maoy naghatag kanila og 92-90 sa nahabiling siyam ka mga segundos.
Sa return play, dala ni Castro ang bola ug nangita kini’g kapasahan apan nakadesisyon kining motira na lang og tres dihang nakakita siya og gamayng kahigayunan.
Ang Tropang Giga gipangulohan ni Poy Erram pinaagi sa iyang 22 puntos, nidugang og 16 puntos si Castro samtang ning-amot og 15 puntos matag usa sila si Glenn Khobuntin ug Mikey Williams.
Sa ilang bahin, ang Hotshots gipangulohan ni Calvin Abueva pinaagi sa iyang 18 puntos, nihatag og 17 puntos si Ian Sangalang samtang nitunol og 15 puntos si Barroca.
Ning pagsuwat, padayon pang nagsangka ang San Miguel Beermen ug Meralco Bolts sa Game 3 sa kaugalingon nilang semi-finals series.