Patay dihadiha ang usa ka menor de edad dihang gidunggab human tulisa sa grupo sa mga batan-on sa ubos sa skywalk sa N. Bacalso Avenue, Barangay Bulacao, Siyudad sa Sugbo niadtong Sabado, Agusto 6, 2022, alas 11:40 sa gabii.
Si Police Senior Master Sergeant Geoffrey Gutual, chief investigator sa Inayawan Police Station 7, kinsa nag-imbestigar sa maong kaso, niila sa biktima nga si Jerome Rivera Estan, 16, taga dalan Demasalang, Barangay Pahina Central, siyudad sa Sugbo.
Matod ni Gutual, ang biktima gitulis sa lima ka mga batan-on diin ang upat niini pulos mga menor de edad usab ug 22 anyos ang usa ka suspek.
Dugang ni Gutual, nihimo sila og hot pursuit operation ug nidapit sa tulo ka mga batan-on alang sa imbestigasyon sa kaso.
Ang usa sa mga suspek nga si Jether Tabora, 22, nga nahinabi sa Superbalita Cebu, nihimakak nga apil siya sa pagtulis-patay ni Estan.
Apan niangkon nga didto siya dapit sa nahitaboan ug nipadayag sa kahibulong bahin sa kagubot nga nahitabo.
Matod ni Tabora, siya dunay kasabot nga bayot nga magtagbo sa dapit apan wala kini mahinayon tungod sa nahitabong kagubot. Samtang, ang duha ka mga menor de edad nga mga 16 anyos, pulos usab ninghimakak nga dunay kalabotan sa krimen.
Ang cellphone sa biktima wala ma-recover hangtod ning pagsuwat. Nakakuha og kasayoran ang kapulisan nga giprenda na kini.
Ang inahan sa biktima nga si Moralyn Estan, 54, nangayo og hustisya sa kamatayon sa iyang anak ug niawhag nga madakpan ang laing duha pa ka suspek nga giingong maoy nidunggab sa iyang anak.
Matod sa inahan, ang iyang pito ka mga anak ug ang namatay maoy kamanghuran, nag-uban sa sayo pa sa selebrasyon sa adlawng natawhan uban sa kaluha sa iyang bana nga nagpuyo sa lungsod sa Minglanilla.
Sa alas 11:00 sa gabii, unang nananghid si Jerome nga moadto sa Bulacao tungod dunay pakigkitaan nga classmate ug gibalibaran sa inahan apan nipugos gyud sa paglakaw.
Sa pag-uli sa pamilya, naagian nila nga dunay nagbuy-od nga patay sa dan ubos sa skywalk ug gikuhaan pa og hulagway sa maguwang sa namatay human wala makaklaro sa biktima tungod sa pagtapok sa daghang tawo.
“Nahibalo lang mi nga ako diayng anak na ang gidunggab kay gipahibalo mi sa akong silingan nga si Jerome ang gidunggab unya patay. Nangatarantar naming tanan niadtong tungora, una mi nga nibalik sa Bulacao,” matod sa inahan nga nagbangotan.